Գասպարին ամոթանք է տվել փաստաբաններին
«Անամոթներ, ես չեմ ուզում ձեր պաշտպանությունը, հեռու մնացեք ինձանից»,- այսպիսի գրությամբ պաստառներ այսօր ակտիվիստ Վարդգես Գասպարին փակցրել է Փաստաբանների պալատի շենքում: Այս մասին «Ա1+»-ին հայտնեց Գասպարին՝ նշելով, որ հրաժարվում է հանրային պաշտպանի գրասենյակի ծառայություններից: Նա այսօր գնացել էր պարզաբանում ստանալու հանրային պաշտպանի գրասենյակից, թե ինչ լիազորությամբ է հանրային պաշտպան Լյուդվիգ Ավետիսյանը փորձել ծանոթանալ կամ ծանոթացել իր գործի նյութերին: Շենգավիթ վարչական շրջանի ընդհանուր իրավասության դատարանում դատավոր Նելլի Բաղդասարյանի նախագահությամբ ընթանում է Վարդգես Գասպարիի գործի քննությունը: Ըստ մեղադրանքի՝ նա դատական նիստերից մեկում վիրավորական արտահայտություններ է հնչեցրել ոստիկանության ներկայացուցիչների եւ դատավորի հասցեին: Գործով դատական նիստերին բերման են ենթարկում, իսկ դատարանը գործով արդեն ներգրավել է երկու հանրային պաշտպան: Առաջին պաշտպանի դեպքում հանրային պաշտպանի գրասենյակը հրաժարվել էր ծառայություններ մատուցել՝ նշելով, որ Գասպարին դա չի ցանկանում: Հիմա դատարանը գործով ներգրավել է նոր հանրային պաշտպան: Դատական հաջորդ նիստը նշանակվել է փետրվարի 15-ին: Դատարանը որոշում է կայացրել Գասպարիին բերման ենթարկելու վերաբերյալ:
