Ճարտարապետի համար մեր արժեքը միայն թամանյանական շենքերն են (տեսանյութ)
«Հին Երեւան» նախագծի հեղինակ, ճարտարապետ Լեւոն Վարդանյանը չի ափսոսում , որ մայրաքաղաքի հին շենքերը քանդվում են։ Ըստ նրա, հնացած, մաշված ու ոչ սեյսամակայունները պետք է փոխարինել նորերով: Նա ոչ միայն այսպես մտածում է, այլեւ գործում։ Երեւանում բազմաթիվ շենքեր արժանացել են այդ «հնացած» պիտակին ու հավասարվել հողին: Արամի 30-ը վերջին, ամենաթարմ օրինակն է: Ճարտարապետն ուզում է, որ մարդիկ թացը չորից տարբերեն ու գնահատեն իսկական արժեքները: Չնայած քաղաքաշինության նախարարի առաջարկին՝ Արամի 30-ի բուլդոզերով քանդված շենքն ընդգրկել «Հին Երեւան» ծրագրում, պարոն Վարդանյանը վստահ է՝ այդ շինությունն իր նախագծում տեղ չունի: Խոսակցությունները, թե շուտով քանդված շենքերը համալրվեն եւս մի քանիսով չեն դադարում; Թիրախային են համարվում հատկապես «Դոլմամայի» շենքն ու Զվարթնոց օդանավակայանի հին մասնաշենքը՝ անկախ պաշտոնյաների հայտարարություններից։ Լեւոն Վարդանյանի համար Երեւանը խորհրդանշող շինություններ են թամանյանական ժամանակաշրջանի շենքերը: Դրանք են, ըստ նրա, մեր պատմությունն ու արժեքները. «Թամանյանի շենքերը պետքա գլխի վրա պահենք, փայփայենք, լպստենք»: Ճարտարապետ Լեւոն Վարդանյանի չափանիշներով արժեքավոր 30 շենք կհայտնվեն «Հին Երեւան» նախագծում: Ըստ պայմանագրի այն պետք է պատրաստ լինի 3 տարի հետո: