«Ուղարկում ենք հեռավոր գյուղ, աշխատավարձն էլ՝ կոպեկներ» (տեսանյութ)
«Բարձրագույն եւ հետբուհական մասնագիտական կրթության մասին» եւ «Կրթության մասին» օրենքներում լրացումներ եւ փոփոխություններ կատարելու մասին նախագծերի փաթեթը քննարկելիս ԲՀԿ պատգամավոր Վահե Հովհաննիսյանը այն միայն կրթական խնդիր չհամարեց: Ըստ նրա՝ սա բազմաշերտ խնդիր է. «Ստացվում է, որ բուհն ավարտելով անընդհատ պարտք է տալիս՝ 2 տարի հայրենիքին, 3 տարի գյուղին: Իսկ մենք ի՞նչ ենք առաջարկում բուհն ավարտած երիտասարդ մասնագետին: Ուղարկում ենք հեռավոր գյուղ՝ ոչ տուն կա, ոչ տեղ կա, ոչ էլ ապրելու բան: Պետական աշխատավարձ է ստանալու՝ կոպեկներ: Երիտասարդ է, պիտի ամուսնանա, մենք այդ գյուղում ի՞նչ ենք տալու նրան: Բնականաբար, ամեն հնարավոր բան անելու է, որ չգնա»,- հայտարարեց նա ու հավելեց, որ պետք է բացի պատժից, պետք է սոցիալական խնդիրը լուծենք: Վահե Հովհաննիսյանը առաջարկեց նաեւ այս օրենքով լուծել նաեւ այն ուսանողների խնդիրը, որոնք միջպետական պայմանագրերով գնում են արտերկիր, սովորում են ու հետ չեն գալիս: Արմեն Աշոտյանը արձագանքեց. «Այս նախաձեռնությամբ չենք կարող լուծել տարիներ շարունակ համակարգում կուտակված խնդիրները: Բայց այդ կծիկը պետք է սկսել քանդել»: