«Եզդիներին վաճառում են 15-200 դոլարով». հացադուլ՝ ՄԱԿ-ի գրասենյակի դիմաց (տեսանյութ)
Եզդիական համայնքի ներկայացուցիչներ Ռուստամ Բաքոյանն ու Սաշիկ Սուլթանյանն այսօր եռօրյա հացադուլի են նստել՝ ՄԱԿ-ի գրասենյակի դիմաց։ Երիտասարդները պահանջում են կառույցից՝ պատշաճ ուշադրություն դարձնել Իրաքի Սինջար եզդիական բնակավայրում իրենց հայրենակիցների նկատմամբ կատարվող ոտնձգություններին։ «Առաջին պահանջն այն է, որ 8000-10.000 եզդիներ, որոնք գտնվում են ծայրահեղականների ձեռքում՝ եզդի կանայք, երեխաներ, ՄԱԿ-ը միջամտի, որպեսզի նրանք վերադարձվեն։ Նրանք այս պահին ենթարկվում են ստրկության, վաճառքի՝ պայմանավորված տարիքով, մաշկի գույնով։ Գինը տատանվում է 15-200 դոլարի սահմաններում»,-«Ա1+»-ի հետ զրույցում նշեց «Շամս» ՀԿ ներկայացուցիչ Ռուստամ Բաքոյանը։ Ասում է՝ հիմա հումանիտար աղետ է եզդիական ճամբարներում և մահմեդականների կողմից այստեղ ևս սպանություններ են տեղի ունենում։ Օրական հինգ, վեց հոգի մահանում է։ «Կան 600.000 եզդի փախստականներ, ովքեր հացի ու ջրի խնդիր ունեն։ Մարդիկ սպանվում են իրենց էթնիկ, կրոնական պատկանելիության համար։ Հիմա ՄԱԿ-ը մեզ ոչնչով չի օգնում։ Կա 6000-անոց եզդիական զորք, որը կռվում է։ Բայց ՄԱԿ-ն այդ ուժին օժանդակություն ցույց չի տալիս»,-իր հերթին նշեց Միջէթնիկ և միջմշակութային համագործակցությունների կենտրոնի ներկայացուցիչ Սաշիկ Սուլթանյանը։ Երիտասարդները եզդիների անվտանգության միակ պայմանը տեսնում են եզդիական ինքնավարության ստեղծման մեջ։ Հիշեցնենք, որ 2014 թվականի օգոստոսի 3-ին «Իսլամական պետություն» խմբավորման զինյալները ներխուժեցին եզդիաբնակ բնակավայրեր և հազարավոր եզդիների սպանեցին: Այսօր հարյուր հազարավոր եզդիներ շարունակում են փախստականի կարգավիճակով ապաստանել այլ երկրներում։