Դպրոցից՝ եկեղեցի, ապա՝ միջոցառման
Չնայած շրջանավարտներին ուղղված ոստիկանության հորդորին՝ ձեռնպահ մնալ մեքենա վարելու գայթակղությունից, այնուամենայնիվ, մայրաքաղաքն այսօր լի է անչափահաս վարորդներով։ Պատանիներից շատերը հուզված ու մեծ սպասումներով են հրաժեշտ տվել դպրոցին՝ հույս ունենալով ընդունվել ցանկալի ուսումնական հաստատությունը։ «Պատրաստվում եմ դիմել Պետհամալսարան, երևի Ռադիոֆիզիկայի բաժին»,-«Ա1+»-ի հետ զրույցում նշեց շրջանավարտներից Լևոն Ավետիսյանը։ Ասում է՝ դպրոցը նոր ընկերներ տվեց, գիտելիքներ ու նաև՝ կյանքի փորձ։ «Շատ հետաքրքիր բաներ կան, որոնք աննկարագրելի են»։ «Շատ ոգևորված ենք։ Դպրոցում շատ լավ անցավ միջոցառումը, հետո եկեղեցի ենք գնացել։ Գնալու ենք նաև միջոցառման։ Հուսով ենք՝ քննությունները լավ կանցնի, կընդունվենք»,-ասաց Հասմիկ Ղարիբյանը։ Պատրաստվում է Ոստիկանության ակադեմիայի քննչական բաժին ընդունվել։ Նրա համադասարանցի Վարդան Դեմիրճյանն իր հերթին նշեց. «Հիմա որ ավարտեցինք, մի քիչ հուզված ենք։ Ես երևի Ֆիզկուլտ ինստիտուտ կգնամ՝ լողի բաժին»։ Վարդանն այսօր զերծ է մնացել մեքենայի ղեկին նստելուց. «Ծնողս էլ է տալիս, բայց ես չեմ վերցնում, որովհետև լիքը վթարներ են լինում»։