Սպանություն, որը էժան նստեց Ռոբերտ Քոչարյանի վրա (տեսանյութ)
Պողոս Պողոսյանի սպանության գիշերը Երեւանը խաղաղ էր, ինչպես բոլոր գիշերները, երբ մարդ չեն սպանում։
Առաջին անգամ Ա1+-ի եթերում խոսվեց Վրաստանի 43-ամյա քաղաքացի, դաշնակցական Պողոս Պողոսյանի սպանության մեջ Ռոբերտ Քոչարյանի թիկնազորի մասնակցության մասին;
«Սրճարանի տնօրինությունը հավաստիացնում էր, որ Պողոս Պողոսյանը մահացել է սրտի կաթվածից՝ չդիմանալով նախագահին ու Շառլ Ազնավուրին տեսնելու ուրախությանը»։
Սպանության պահին գործող նախագահ Ռոբերտ Քոչարյանը Շառլ Ազնավուրի եւ այլ հյուրերի հետ «Առագաստ» սրճարանում ջազ է լսել։ Թիկնազորը սրճարանի զուգարանում ավարտում էր այն, ինչ սկսել էր մյուսների ներկայությամբ.
«Շատ ռեալ, կոնկրետ նաեւ փաստեր կան, որ կատարվածը սպանություն է», ասում է Աղվան վարդանյանը
ՀՀ Արդարադատության նախկին նախարար Դավիթ Հարությունյանը փորձում է վերծանել տեղի ունեցածը. « Համադրելով իրադարձությունները հիմա կարող եմ ասել, որ ինչ-որ բան էնտեղ տեղի է ունեցել եւ սա սովորական դժբախտ պատահար հավանաբար չէր կարող լինել»։
Տեղի էր ունեցել այն, որ Պողոս Պողոսյանը սրճարանում Ռոբերտ Քոչարյանին տեսնելուց հետո դիմել էր ոչ հարգալից՝ Պրիվետ, Ռոբ։ Ուստի սպանվեց:
«Հենց առաջին զննումը ինձ համար արդեն միանգամից պարզ էր, որ մահացած է», հավաստիացրել է առողջապահության նախկին նախարար Գագիկ Ստամբոլցյանը:
Սպանություն կատարելու համար մեղադրվեց Քոչարյանի թիկնազորի անդամ Աղամալ Հարությունյանը։
Դատավարության ժամանակ թիկնազորի այս աշխատակիցը ասում է, որ Պողոս Պողոսյանն է ծեծել Աղամալ Հարությունյանին:
Սպանվածի եղբայրը հիմնական մեղավոր է համարում հենց Գուրգեն Արսենյանին. «Գուրգեն Արսենյանն է հրավիրողը եղել եւ պատճառը դառել ամեն ինչի: Բայց Գուրգեն Արսենյանն էսօր վկա է հանդես գալիս»:
Այս կինը Փարաջանովի տուն-թանգարանի աշխատակից է, հիշում է, որ մի խումբ երիտասարդներ ծեծելով ու քաշքշելով մեկին փորձում են մտցնել «Առագաստ» սրճարանի զուգարան: Սպանության փաստը առաջինը երկչոտորեն արձանագրել է մի օտարերկրացի, ասելով՝ «դա պահակազո՞րն է սպանել»:
Շտապօգնության բժիշկ Արմեն Սահակյանը առաջին իսկ հետաքրքրվողներին Պողոսյանի մահվան պատճառ է համարել սրտի կաթվածը «Երբ որ մարդիկ վրդովված քեզ հարցնում են՝ բա ինչի՞ց մահացավ, էդ ժամանակ կարող ես կանտրոլից դուրս գաս, սփոփող պատասխան տաս»:
Սրճարանի աշխատակիցներից ոչ մեկը տեղյակ չի եղել, թե ինչ է կատարվում իրենց քթի տակ:
Վկաներից մեկն, ի դեպ, կոնսերվատորիայի պրոֆեսոր Ստեփան ռուստամյանը սկզբից սրճարանում գտնվողների մեջ ճանաչել է Ռոբերտ Քոչարյանին, հետո չի ճանաչել «Խոստովանեմ, որ նախագահին էլ չեմ տեհել»:
Սպանվածի եղբայրը ականատես վկաների սակավությունն ու հակասական տեղեկությունները բացատրում էր մեկ բառով. ՎԱԽ:
«Մարդուն հասարակությունն է դարձնում անբարոյական»,- Շավարշ Քոչարյան:
Դատավճռով Աղամալ Հարությունյանը փորձել է կարգի հրավիրել «Պրիվետ, Ռոբի» հեղինակին: Չի հաջողվել:
Ուստի նրան սպանելու մեջ առանձնապես դատապարտելի բան չկա, թերեւս կնստի 2 տարի;
Դատավոր Մնացական Մնացականյան. « ՀՀ քրեական օրենսգրքի 41 հոդվածի կիրառմամբ նշանակված պատիժը ամբաստանյալ Աղամալ Հարությունյանի նկատմամբ պայմանականորեն չկիրառել»։
Ամբաստանյալի պաշտպան ՝Վահան Յանիկյան. «Դատավճիռ ա եղել ու ծափեր են եղել»:
«Քոչարյան Ռոբերտի թիկնազորը դատարան չի: Ուրեմն նա իրականացնում ա սպանություն մեր աչքի առաջ։ Ասում ա՝ ես Պողոս Պողոսյանին զրկում եմ կյանքից, քանի որ ինքը ոչ վայել դիմել է Ռոբերտ Քոչարյանին», ասում է Աշոտ Բլեյանը:
Ռոբերտ Քոչարյան՝, «եթե այդ մարդը մահացած չլիներ, ես նաեւ այդ առումով շատ բան կունենայի ասելու: Ուղղակի հիմա չեմ կարում ասեմ»:
Ի դեպ այդ օրերին Հայաստանում էր Հռոմի Պապ Հովհաննես Պողոս 2-րդը։ Պարոն Քոչարյանը նրան դիմավորողների մեջ էր։
Թիկունքում Պողոս Պողոսյանին Աղամալ Հարությունյանին ծեծելու մեջ մեղադրող Գուրգեն Արսենյանն է։
Այստեղ Ռոբերտ Քոչարյանը խոսում է քրիստոնեությունից Ռոբերտ Քոչարյան՝, «Նոր դարաշրջանում մենք պետականորեն վերաիմաստավորում ենք մեր պատմամշակութային ողջ ժառանգությունը եւ արժեքային համակարգը, որոնք խորապես ներթափանցված են քրիստոնեությամբ»։
Հայաստանից Պապը վերադարձավ ողջ եւ առողջ, թեպետ՝ փոքր-ինչ հյուծված։
Պողոս Պողոսյանից մնաց անշունչ մարմինը։
