ԱԴՐԲԵՋԱՆԸ ՑԱՆԿԱՆՈՒՄ Է ՀԱՆԴԵՍ ԳԱԼ ՉԵԶՈՔ ԴԱՇՏՈՒՄ
Աջակցիր «Ա1+»-ին
Ադրբեջանի ֆուտբոլի ֆեդերացիայի քարտուղար Ֆահիդ Մուսաեւը հայտարարել է, որ խորհրդակցություն անցկացնելուց հետո եկել են այն եզրակացության, որ Ադրբեջանի եւ Հայաստանի ֆուտբոլի հավաքականների միջեւ նախատեսված հանդիպումները նպատակահարմար է անցկացնել չեզոք դաշտում: Մինչ այդ Մուսաեւը հայտարարել էր, որ առավել հավանական է Թբիլիսիի տարբերակը:
Հայկական կողմն արդեն մի քանի անգամ հայտարարել էր, որ պատրաստ է ընդունել Ադրբեջանի հավաքականին եւ անվտանգության երաշխիքների դեպքում մեկնել Բաքու: Մասնավորապես Հայաստանի ֆուտբոլի ֆեդերացիայի նախագահ Ռուբեն Հայրապետյանը «Ա1+»-ին ասել էր, որ հանդիպումներն, ըստ ՈւԵՖԱ-ի պահանջների, պետք է կայանան միմյան հարկի տակ եւ Հայաստանը հենց վիճակահանությունից հետո է իր պատրաստակամությունը հայտնել այս տարբերակի օգտին:
Երեկ ՀՖՖ-ի գործադիր տնօրեն Արմեն Մինասյանը նշել է, որ Հայաստանը պատրաստ է առաջինը մեկնել Բաքու:
Առայժմ չեզոք դաշտի տարբերակը չի քննարկել ՈւԵՖԱ-ն, որին էլ պատկանում է վերջին խոսքի իրավունքը: Ամենայն հավանականությամբ հանդիպումների անցկացման վայրը կորոշվի փետրվարի 10-ին Բրյուսելում կայանալիք քննարկման ժամանակ, որի ընթացքում որոշվելու է ընտրական առաջին խմբի խաղացանկը: