ԳԵՂԱՐՔՈՒՆԻՔԻ ՄԱՐԶՈՒՄ ՈՒՍՈՒՄՆԱՍԻՐՎՈՒՄ ԵՆ ԲՈԼՈՐ ԹՌՉՈՒՆՆԵՐԸ
Աջակցիր «Ա1+»-ինԼուրեր մարզերից
ՀՀ Գյուղնախարարության անասնաբուժության պետական տեսչության՝ թռչնագրիպի դեմ պայքարի Գեղարքունիքի մարզային բաժինը տեղեկացնում է, որ վերջին 10 օրերի ընթացքում մարզում ախտորոշվել են բոլոր սատկած թռչունները: Միաժամանակ, թռչուններին բնորոշ «նյուկասլ» հիվանդության դեմ բոլոր համայնքներում ընթանում են թռչունների պատվաստումներ:
Ախտորոշումը ցույց է տվել, որ թռչունների անկումը հիմնականում կապված է թունավորման, հրազենային կամ այլ կարգի վնասվածքների, ճիճվային եւ «կեղծ ժանտախտ» կոչվող կամ «նյուկասլ» հիվանդությունների հետ: Իրավիճակը վերահսկվում է թե՛ ընտանի եւ թե՛ վայրի թռչունների շրջանում: «Գեղարքունիքի մարզային եւ մայրաքաղաքային ախտորոշման կենտրոններում ստուգվել են Լանջաղբյուր, Գավառ, Նորատուս, Հայրավանք եւ այլ վարչական տարածքներում սատկած թռչունները, որոնցից եւ ոչ մեկը թռչնագրիպից չի սատկել»,- հավաստիացնում են ՀՀ Գյուղնախարարության անասնաբուժության պետական տեսչության՝ թռչնագրիպի դեմ պայքարի Գեղարքունիքի մարզային բաժնի մասնագետները:
Չնայած հավաստիացումներին մարդիկ շարունակում են ոչնչացնել իրենց ընտանի թռչուններին: Նվազել է նաեւ թռչնամսի, դրանից պատրաստված սննդամթերքի եւ ձվի վաճառքը:
«Քյավառ» հ/ը
7 000-Ը ԴԱՐՁԱՎ 8 000
Տաքսիները շատանում են ոչ միայն մայրաքաղաքում, այլեւ մարզերում, իսկ դա նշանակում է, որ այդ գործունեությամբ զբաղվելը գոնե ներկա պայմաններում եկամտաբեր է:
Սեւանում տաքսու ծառայություն իրականացնելու թույլտվություն ստանալու համար համայնքի ավագանին 2006թ-ին սահմանել է տեղական տուրքի նոր վճար` 8000 դրամ: Սա 1000 դրամով ավելի է նախորդ տարվա համար սահմանվածից:
Վճարի բարձրացումը պայմանավորված է Սեւանում տաքսի-սերվիսների ավելացմամբ: Իսկ հիմնավորումը հետեւյալն է. հաշվի առնելով այն, որ այս ծառայությունը վայելում է մեծ պահանջարկ, տաքսու վարորդները չպետք է խուսափեն վճարել 8000 դրամ՝ միաժամանակ ունենալով անհատ ձեռնարկատիրոջ վկայական:
«STV1» հ/ը