ՀԱՅԵՐԸ ՉՄԵԿՆԵՑԻՆ ԲԱՔՈՒ
Աջակցիր «Ա1+»-ին
Այսօր Ադրբեջանի մայրաքաղաքում մեկնարկում է ՆԱՏՕ ԽՎ կազմակերպած երկօրյա «Րոուզ-Րոուդ» սեմինարը: Չնայած նախնական որոշմաը, որ Հայաստանի պատվիրակությունը նույնպես մասնակցելու է այդ աշխատանքներին, այնուամենայնիվ, հայկական կողմը չի մեկնել Բաքու:
Մինչ Բաքվում «սեւ փուչիկներով» ցույց էին կազմակերպել ընդդեմ Հայաստանի պատվիրակության այցին, պատվիրակության անդամները՝ Բաքու մեկնելու փոխարեն այսօր ներկայացան ԱԺ ավանդական ճեպազրույցին:
Հիշեցնենք, որ Հայաստանի պատվիրակությունը նամակ էր հղել ՆԱՏՕ-ին՝ մուտքի վիզայի հարցը լուծելու խնդրանքով: Հավանաբար, հիշելով մի քանի ամիս առաջ ՆԱՏՕ զինավարժանքները հետաձգելու նախադեպը, սկզբնական շրջանում հայ պատգամավորի այցին դեմ չէին նաեւ Ադրբեջանի Միլի-Մեջլիսի ղեկավարները:
Վերջին պահին, սակայն, հայտնի դարձավ, որ Ադրբեջանի պաշտոնյաները չեն երաշխավորել հայ պատգամավորների անվտանգությունը: Այդ պատճառով էլ ԱԺ բոլոր քաղաքական ուժերի ներկայացուցիչները՝ քննարկելով պատվիրակության մեկնելու խնդիրը որոշեցին, որ ստեղծված պայմաններում պատվիրակությունը չպետք է մեկնի Բաքու:
Ի դեպ, ադրբեջանական ԶԼՄ-ները սկսել են «վերհիշել», որ Հայաստանի պատվիրակության անդամները՝ Մհեր Շահգելդյանն ու Ալեքսան Կարապետյանը ժամանակին մասնակցել են Ղարաբաղյան պատերազմին: