ՀԱՅԱՍՏԱՆԸ ՕՐԻՆԱԿ ՊԵՏՔ Է ՎԵՐՑՆԻ ԿՈՐԵԱՅԻՑ
Աջակցիր «Ա1+»-ին
«Տնտեսական բարձր աճ, նվազագույն սղաճ, բնակչության եկամուտների 10-15 տոկոս աճ, հսկայական ներդրումներ»: ՀՀ Առեւտրի եւ տնտեսական զարգացման նախարար Կարեն Ճշմարիտյանը սա ծանուցեց Հայկական միջազգային տնտեսական ֆորումի պատվիրակներին՝ ավելացնելով, որ «Հայաստանը դիֆերսիկացված եւ դինամիկ զարգացմամբ գործընկեր է»:
Ըստ նախարարի, Հայաստանը կայուն զարգացման հայտ ներկայացնողի վճռականություն ունի եւ ինտեգրվում է համաշխարհային տնտեսությանը: Ճշմարիտյանի խոսքերով, պետություն-մասնավոր հատված գործընկերությունն էլ Հայաստանում ամուր հիմքերի վրա է:
Համաշխարհային Հայկական Կոնգրեսի կազմակերպած ֆորումի մասնակիցները տեղեկացան, որ Հայաստանն առայժմ չունի կայուն տնտեսական ռազմավարության հայեցակարգ. այն ներկայումս մշակում են եւ ընդունելու են:
Այս ելույթից հետո Հայաստանում Հարավային Կորեայի դեսպանը պատմեց՝ ինչպես է տնտեսապես զարգանում իր երկիրը: Պարոն դեսպանը նշեց, որ Կորեայում իրենք նախ խթանել են մանր ձեռնարկատիրությունը՝ բարձրացնելով բնակչության կենսամակարդակը, իսկ հետո մշակել են հատուկ ռազմավարություն: Նույնն անել նա խորհուրդ տվեց Հայաստանին.«Կորեան լավ օրինակ է Հայաստանի համար»: Նա վստահ է, որ այդ կստացվի, քանի որ. «Հայաստանն օժտված է կիրթ ժողովրդով»: