ՔԱՂԲԱՆՏԱՐԿՅԱԼՆԵՐԸ ՀԵՏՈ՞ ԵՆ ԼԻՆԵԼՈՒ
Աջակցիր «Ա1+»-ին«Ասել էի, չէ՞, մինչեւ 100 օրս չլրանա, տեղ չեմ գնալու: Հիմա լրացել է՝ գնում եմ», - Ֆրանկֆուրտից Ստրասբուրգ մեկնող ավտոբուսում ասաց ՀՀ մարդու իրավունքների պաշտպան Լարիսա Ալավերդյանը:
Նա վերադառնում էր Վարշավայից, որտեղ հինգ օր իր օգնականի հետ ծանոթացել էր լեհական մարդու իրավունքների պաշտպանի ինստիտուտի աշխատանքին եւ փորձին: Այն, ըստ ՀՀ օմբուդսմենի, աշխարհում ամենահաջողվածներից է:
Լարիսա Ալավերդյանը Վարշավայում եզրակացրել է, որ այստեղ անշեղորեն հետեւում են երկրի առաջին օմբուդսմեն Եվա Լենտովսկայայի սկզբունքներին: «Մարդու իրավունքների պաշտպանի աշխատանքն անվերջ է»,- նշեց նա՝ մեջբերելով Եվա Լետրովսկայայի խոսքերը, թե այդ նույն է, ինչ թեյի գդալով սարի չափ ավազը հարթեցնելը:
Լարիսա Ալավերդյանն ու նրա ուղեկիցը Լեհաստանից գալիս էին ոչ միայն տարբեր կառույցների ներկայացուցիչների հետ հանդիպումների տպավորություններով, այլեւ, իրենց բառերով, գրքեր ու նյութեր են տանելու Հայաստան:
Ստրասբուրգում այսօր առավոտից նրանք հանդիպելու են Մարդու իրավունքների եվրոպական դատարանի տարբեր բաժանմունքերի ներկայացուցիչների, ինչպես նաեւ հայաստանցի դատավոր Ալվինա Գյուլումյանի հետ:
«Մեզ օժանդակություն է պետք», - ասաց Լարիսա Ալավերդյանը ավելացնելով, որ ոչ թե ֆինանսական, այլ տեխնիկական, այսինքն՝ փորձագիտական աջակցություն եւ գրականություն:
Նրա կարծիքով, Հայաստանում օմբուդսմենի ինստիտուտի հիմքերն ամրապնդելու համար պետք է հասարակության իրավագիտակցության բարձրացում, համագործակցություն տարբեր ուժերի հետ, բողոքների հետ աշխատանքի տեխնոլոգիայի մշակում: Դրա համար, ըստ նրա, անհրաժեշտ է նվազագույնը երկուսից երեք տարի: Այդ մասին Լարիսա Ալավերդյանն ասելու է Ստրասբուրգում:
Իսկ ի՞նչ կասի Հայաստանի օմբուդսմենը, եթե Եվրախորհրդում նրան հարցնեն, թե ինչու՞, հակառակ իրենց պահանջի, Հայաստանում դեռեւս կան քաղբանտարկյալներ, ինչպես օրինակ՝ Էդգար Առաքելյանն ու Լավրենտի Կիրակոսյանը: «Ես չեմ համարում, որ նրանք քաղբանտարկյալներ են», - եղավ պատասխանը:
Ըստ նրա, պետական մարմինների կողմից եղել են չարաշահումներ ու ցուցարարների արարքներին տրվել են ոչ համարժեք գնահատակններ. «Կամ ասում են՝ խուլիգան է, կամ քաղբանտարկյալ:Ասես արանքում այլ որակումներ չկան»:
Լարիսա Ալավերդյանը կարծում է, որ այսօր «այդպես հեշտությամբ չպետք է օգտագորել քաղբանտարկյալներ արտահայտությունը, քանի որ ռեալ դեպքում խնդիրը կբարդանա»:
Ստրասբուրգ
Կարինե Ասատրյան
«Ա1+»
