«Ա1+»-Ը ԵՎՐՈԴԱՏԱՐԱՆՈՒՄ ՇԱՀԵԿԱՆ ՎԻՃԱԿՈՒՄ Է
Աջակցիր «Ա1+»-ին«Քարը տեղից շարժվեց, եւ ջուրը հոսեց: Տեսնենք` ինչ է սպասվում մեզ Հայաստանում խոսքի ազատության ոլորտում»,- Ժուռնալիստի տանը հայտնեց «Մելտեքս» ՍՊԸ` «Ա1+» հը տնօրեն Մեսրոպ Մովսեսյանը:
Նա եւ «Ա1+»-ի շահերի ներկայացուցիչ, Փաստաբանների միջազգային միության նախագահ Տիգրան Տեր-Եսայանը այսօր մամուլի ասուլիս էին հրավիրել տեղեկացնելու, որ Մարդու իրավունքների Եվրոպական դատարանը որոշում է կայացրել «Ա1+»-ի հայցով պալատ ձեւավորելու եւ քննություն անցկացնելու վերաբերյալ:
37-րդ հեռուստակապուղուց ապօրինաբար զրկվելու, իրավունքների ոտնահարման հայցով «Ա1+»-ը Եվրադատարան է դիմել 2002 հոկտեմբերին, գանգատի վերջնական փաթեթը ուղարկվել է 2003թ հունվարին: «Մենք շահեկան վիճակում ենք»,- հայտարարեց Տիգրան Տեր-Եսայանը, քանի որ Եվրոդատարանը արդեն ծանուցել է ՀՀ կառավարությանը` պատասխանել 4 հիմնական հարցերի եւ բացատրել, թե ինչու «Ա1+»-ի հայցը չպետք է ընդգրկվի վարույթում:
Կկարողանա՞ արդյոք ՀՀ կառավարությունը ապացուցել, որ «Ա1+»-ի իրավունքները չեն ոտնահարվել, դժվար է ասել: Եթե, ըստ Տիգրան Տեր -Եսայանի, «Ա1+»-ի` մոտ 1000 էջանոց գանգատը պատրաստվել է մեկ տարուց ավելի ժամանակում եւ անընդհատ էլ թարմացվում է, ապա ՀՀ կառավարությունը իր մերժման պահանջը պետք է ներկայացնի մինչեւ 2004թ սեպտեմբերի 20-ը:
Դրանից հետո Եվրոդատարանում կկայանան բաց լսումներ, որոնց կմասնակցի նաեւ «Ա1+»-ի ներկայացուցիչը: Եթե ՀՀ կառավարությունը մինչ այդ չպատասխանի այս նամակին, մինեւնույն է դատական գործընթացը կշարունակվի իր հունով:
Հնարավո՞ր է, որ դատարանը կողմերին առաջարկի հաշտություն կնքել: Ըստ Տիգրան Տեր-Եսայանի, Եվրոդատարանը ամենայն հավանականությամբ նման առաջարկ կանի, սակայն եթե կնքվի նման պայմանագիր, ապա դրա մանրամասները կլինեն խիստ գաղտնի:
Իսկ ի՞նչ է սպասվում «Ա1+»-ին` Եվրոդատարանում հաղթելու դեպքում: «Հաճախականություն չեն տալու»,- ասաց պարոն Տեր-Եսայանը` բացատրելով, որ նման պահանջ հայցում չկա: Հատուցումը կլինի բարոյական եւ նյութական:
