ՆԿԱՐԻՉԸ ՉՄԱՍՆԱԿՑԵՑ ԻՐ ՑՈՒՑԱՀԱՆԴԵՍԻ ԲԱՑՄԱՆԸ
Աջակցիր «Ա1+»-ինԱյսօր «Հայ-Արտ» մշակութային կենտրոնում տեղի ունեցավ «Սարգիսը Հայաստանում» ցուցահանդեսի բացումը: Հատկանշական է, որ ֆրանսիացի նկարիչը հայկական ծագում ունի, բայց ծնվել է Ստամբուլում:
Սարգիսը առաջին անգամ է ցուցադրվում Երեւանում՝ «Հայ-Արտ»-ում եւ Փարաջանովի թանգարանում:
Երկու ցուցահանդեսները կընթանան միաժամանակ՝ մայիսի 19-ից մինչեւ օգոստոսի 29-ը:
Ի դեպ, ֆրանսիահայ նկարիչը հենց սկզբից ցուցադրեց իր անհատականությունը:
Քանի որ բացման արարողության մասնակիցները շատ էին աղմկում, նկարիչը թողեց եւ հեռացավ իր իսկ ցուցահանդեսի բացման արարողությունից:
Ինչ վերաբերում է միջոցառմանն, ապա Սարգիսը ներկայացրել էր չորս պատկեր: Յուրաքանչյուր պատկերն իրենից ներկայացնում էր 5մ/5մ քառակուսի հարթակներ՝ գետնից 20սմ բարձր:
4 հարթակների մակերեսները հարթեցված էին եւ սպիտակ: Դրանցից երեքը նկարված էին երեք փայլատ գույներով՝ նռան կարմիր, երկնագույն եւ դեղին:
Չորրորդ հարթակը ծածկված էր հայկական գորգերով: 4 հարթակների միջեւ տեղադրված էր բյուրեղապակյա մի քանդակ, որը պատկերում էր մի գլուխ՝ տիեզերագնացի սաղավարտով: Իսկ դահլիճում մի ձայնակիչ պարբերաբար հնչեցնում էր Անդրեյ Տարկովսկու «Ստալկեր» Ֆիլմի երաժշտությունից 2 րոպեանոց մի հատված:
Կազմակերպված ցուցահանդեսը եւս մեկ առանձնահատկություն ունի. այն կրում է բողոքի ակցիայի բնույթ եւ այն արվել է «Հայ Արտ»-ի շենքը պահպանելու համար, որովհետեւ Քաղաքապետարանը որոշել է արվեստագետներից վերցնել այն: