Արդյոք ինչ-որ մեկը չի՞ թաքցնում
Աջակցիր «Ա1+»-ին«Եթե ինչ-որ մեկը կապուղի է թաքցնում, ապա ես դրանից տեղյակ չեմ»,-«Ա1+»-ին ասաց Կապի եւ Տրանսպորտի նախարար Գուրգեն Սարգսյանը:
Հիշեցնենք, որ նախորդ շաբաթ, ՀՀ Վերահսկիչ պալատի խորհրդի նիստում պատգամավոր Անահիտ Բախշյանին ասվել էր, թե ազատ կապուղի կա: Երբ այդ մասին բարձրաձայնեց «Ժառանգության» պատգամավորը, Վերահսկիչ պալատից սկզբում հայտարարեցին, թե Անահիտ Բախշյանը թյուրիմացության մեջ է, հետո էլ թե' զեկույց ներկայացնողը հարցը չի լսել: Իսկ պատգամավորի հարցը նույնն էր, ինչ «Ա1+»-ն ուղղեց նախարար Գուրգեն Սարգսյանին;
- Հայաստանում կա՞ն ազատ հեռուստակապուղիներ:
- Գիտեք, հիմա հեռուստատեսության զարգացման տարբեր տեխնոլոգիաներ կան, որոնք եթերային կապուղիների հետ կապ չունեն, եւ մենք չենք կարող մեկը մյուսի հետ կապել կամ շփոթել: Այսօրվա դաշտը, լիցենզավորման համակարգը, այդ լիազորությունները վերապահված են Հեռուստատեսության եւ ռադիոյի ազգային հանձնաժողովին, իրենք են այդ դաշտը կարգավորում այսօր: Իրենք իրենց տրված չափաքանակների մեջ իրենց ամբողջ հնարավորությունները սպառել են: Եթե նոր տեխնոլոգիաները նոր հնարավորություններ կընձեռնեն հետագայում, կանդրադառնանք:
- Իսկ ինչպե՞ս է ընթանում հեռարձակման ոլորտի թվայնացումը:
- Թվայնացման խնդրով միջգերատեսչական հանձնաժողովն է զբաղվում: Այս պահին հայեցակարգի մշակման աշխատանքներ են կատարվում: Արդյունքների մասին տեղյակ կլինեք: Համենայնդեպս, մենք ժամկետներ ունենք, ժամկետներում տեղավորվում ենք:
- Եթե, ինչպես ասացիք` ազատ կապուղիներ չկան, այդ նշանակո՞ւմ է, որ ԵԽԽՎ պահանջի կատարման' բաց, արդար եւ թափանցիկ մրցույթի անցկացման համար վեստին պետք է փոփոխվի «Հեռուստատեսության եւ ռադիոյի մասին» ՀՀ օրենքը, որով սառեցվում են մրցույթների անցկացումը մինչեւ 2011թ:
- Մրցույթն անցկացվելու է 2011թ, երբ որ մենք անցնենք թվային համակարգի:
- Այսինքն' մինչ այդ որեւէ մրցույթ չի՞ անցկացվելու:
- Օրենքը( դուք էլ գիտեք, ես էլ) բոլորիս համար մեկն է. մինչ այդ օրենքով այդ նախատեսված չի:
Զրուցեց Կարինե Ասատրյանը