«Ալիեւը հստակ ասել է»
Աջակցիր «Ա1+»-ին«Ահա եւ իմ հայ գործընկեր Արմեն Ռուստամյանը չի եկել Ստրասբուրգ»,- ԵԽԽՎ-ում Ադրբեջանի պատվիրակության ղեկավար Սամադ Սեիդովն ահա այսպես արձագանքեց դիտարկմանը, թե ինչու են ադրբեջանցիները բողոքում հայ-թուրքական հարաբերությունների զարգացումից: Բայց այդ արդեն ձայնագրիչն անջատելուց հետո:
Սամադ Սեիդովն այսօր Ստրասբուրգում պատասխանել է «Ա1+»-ի հարցերին :
-Ինչպե՞ս եք գնահատում հայ-թուրքական հարաբերությունների վերջին զարգացումները :
-Չկա այստեղ որեւէ գաղտնիք : Մենք ընդհանրապես հետաքրքրված ենք, որ տարածաշրջանում բոլոր պետությունների միջեւ հաստատվեն նորմալ, բարիդրացիական հարաբերություններ, որոնք կնպաստեն զարգացմանը : Բայց եթե մենք իսկապես ցանկանում ենք հաստատել այդ հարաբերությունները, մենք պետք է հաշվի առնենք իրողությունները: Առանց այնպիսի իրողությունները հաշվի առնելու, ինչպիսիք են Լեռնային Ղարաբաղը, ադրբեջանական տարածքների օկուպացիան, բարիդրացիական հարաբերությունների իրական զարգացում անհնար է :
- Դուք չե՞ք համարում, որ Ադրբեջանն այս կերպ շանտաժի է ենթարկում Թուրքիային :
- Մենք ոչինչ չենք ասում: Թուրքիան անկախ սուվերեն պետություն է, ինչպես եւ Հայաստանը: Եվ Ադրբեջանը որեւէ մեկին որեւէ հանգամանքում շանտաժի չի ենթարկում: Եթե դուք նկատի ունեք բողոքի ակցիաները Թուրքիայում, Բաքվում, ապա այդ հասարակական կարծիքն է, այդ ժողովրդավարությունն է : Բայց երբեք որեւէ մեկը պետական մակարդակով չի ձեռնարկել եւ չի ձեռնարկի որեւէ գործողություն: Այդ Թուրքիայի եւ Հայաստանի ներքին հարցն է : Բայց նաեւ Ադրբեջանի ներքին հարցն է այս իրավիճակում մտածել իր ազգային շահերի մասին : Ես պնդում եմ եւ համոզված եմ, որ առանց ԼՂ հիմնախնդրի կարգավորման, որը շատ կարեւոր է տարածաշրջանի զարգացման համար, դժվար թե հաջողի բարիդրացիական հարաբերությունների հաստատումը:
- Դուք հնարավոր համարո՞ւմ եք Լեռնային Ղարաբաղի խնդրի կարգավորումը :
- Իհարկե :
- Ե՞րբ :
- Չգիտեմ, ոչ ոք հավանաբար չգիտի : Բայց ինչքան արագ, այնքան լավ: Ժողովուրդները կդադարեն միմյանց հանդեպ թշնամաբար վերաբերվել : Ինչքան արագ միջազգային օրենքը գա Ղարաբաղ, ինձ թվում է` այնքան լավ կլինի եւ Ադրբեջանի, եւ Հայաստանի համար: Ադրբեջանի նախագահը վերջերս Մոսկվայում էր, Հայաստանի նախագահն էլ էր վերջերս Մոսկվայում: Ներկայումս տարածաշրջանի աշխարհաքաղաքական զարգացումները ակտիվացել են: Ըստ իս` օգտակար են այդ կոնտակտները, նախատեսվում են հանդիպումներ, որպեսզի վերջապես գտնվի լուծումը այդ շատ հին, ցավալի խնդրի, որը խանգարում է ամբողջ տարածաշրջանի զարգացմանը եւ պետությունների միջեւ հարաբերությունների հաստատմանը :
- Դուք հավանակա՞ն եք համարում, որ Թուրքիան կդառնա ԵԱՀԿ Մինսկի խմբում միջնորդ երկիր :
- Չեն կարող ասել : Այդ պետք է Թուրքիային հարցնել :
- Իսկ ցանկանո՞ւմ եք :
- Ինչ վերաբերում է ԼՂ հիմնախնդրի կարգավորմանը, ինձ թվում է մեր երկրի նախագահը մոսկովյան այցի ժամանակ հստակ ցույց տվեց մեր դիրքորոշումը : Մենք գիտակցաբար ենք մոտենում Լաչինի միջանցքի խնդրին, մենք գտնում ենք, որ մեր փախստականները պետք է վերադառնան այն շրջանները, որտեղից տարահանվել են, Եվ մենք համարում ենք, որ Լեռնային Ղարաբաղի կարգավիճակը ապագայում կարելի է սահմանել. այդ այսօրվա խնդիր չէ :
- 15 տարի հետո՞ :
- Թող այդ քաղաքական գործիչները որոշեն : Բայց ես այդ համարում եմ հիանալի հիմք փոխհարաբերությունները սկսելու համար :
-Իսկ դուք գիտե՞ք, որ Հայաստանում այլ կերպ են մտածում :
-Ես չգիտեմ, թե Հայաստանում ինչ կարծիք է : Այդ դեպքում արդեն հայ քաղաքական գործիչները, հայ ժողովուրդը պետք է որոշի` ինչ եւ ինչպես անել :
Զրուցեց Կարինե Ասատրյանը
Ստրասբուրգ
