Ընտրվեցին տարվա լավագույն ընթերցողները
2-րդ դասարանի աշակերտուհի Սոնա Չոբանյանը գրող Սուրեն Մուրադյանից անձամբ ստացավ իր նվեր գիրքը: Սոնան այս տարվա «Մանկապատանեկան գրքի ընթերցանություն» մրցույթի հաղթողներից է։ Ավ. Իսահակյանի անվան գրադարանում այսօր մեկնարկեց Մանկապատանեկան գրքի և երաժշտության շաբաթը: Փոքրիկ ընթերցողների սատարելու էին եկել ժամանակակից գրողներն ու մանկագիրները, ովքեր անձամբ իրենց գրքերը նվիրեցին լավագույն ընթերցողներին: «Տարվա լավագույն ընթերցող» միջոցառման նպատակը երիտասարդ ընթերցողին գրքի հետ կապելն է: Այս ավանդույթը ձևավորվել է Հայրենական պատերազմի ժամանակներից: Մրցույթը հայտարարվում է մինչև 15 տարեկան երեխաների համար:Իսկ հաղթողն ընտրվում է ընթերցանության հաճախելիության սկզբունքով: Այս տարի 9 տարբեր գրադարանններից ընտրվեցին 1 կամ 2 ընթերցող: 8 -ամյա Էլենը, ով մրցույթի մասնակիցներից է շատ է սիրում Թումանյան կարդալ: Հեքիաթներից ամենաշատը սիրում է «Կռնատ Աղջիկը»: Էլենին հեքիաթի հերոսուհու բարիությունն է դուր գալիս, այդ առումով շատ է ուզում նմանվել նրան: Ավ. Իսահակյանի անվան գրադարանի գիտական գծով փոխտնօրեն Ռուզաննա Բարսեղյանը տեղեկացնում է. «Տարեկան 30-35 000 ընթերցող ենք ունենում, որոնց մեծ մասը, մոտ 70 տոկոսն ուսանողներն են»: Նրա խոսքով բավականին շատ են գեղարվեստական գրականություն նախընտրողները: Բացի հին գրողներից, երիտասարդները ժամանակակից գրողների գրականությամբ ևս հետաքրքրված են: Հիմնականում կարդում են Արամ Պաչյանի, Խաչիկ Մանուկյանի, Դավիթ Մշեցու, Արուսյակ Օհանյանի գրքերից: