«Վերածնունդ» թաղամասի վարկավորման պայմանները փոփոխվել են (տեսանյութ)
«Վերածնունդ» թաղամասի առաջին շենքը նախատեսվում է շահագործման հանձնել արդեն այս տարի։ Տերունական աղոթքով այսօր տեղի ունեցավ հիմնարկեքը։ Մոնթե Մելքոնյանի փողոցին հարակից 6.57 հա մակերեսով հողամասում՝ ժամանակակից ճարտարապետական լուծումներով «Վերածնունդ» երիտասարդական ավանի կառուցումը նախատեսվում է ամբողջությամբ ավարտել 2022թ-ին։ «Մատչելի բնակարան երիտասարդ մասնագետներին» բնակարանային ապահովության սոցիալական ծրագրով «ԵՊՀ շրջանավարտների միավորում» հասարակական կազմակերպությունը նախատեսում է կառուցել 1100 բնակարան։ Թաղամասում կառուցվելու է նաև մանկապարտեզ, մարզահամալիր, առևտրի և սպասարկման կենտրոն, կինոթատրոն: «ԵՊՀ շրջանավարտների միավորում» ՀԿ նախագահ Արսեն Քարամյանը լրագրողների հետ զրույցում անդրադառնում է բնահպանների հայտարարություններին, թե կառուցվող թաղամասի հողերը սողանքային են: «Հոսող հողեր այստեղ չունենք, մասնագետներն ավելի լավ կպատասխանեն այդ հարցին։ Բնապահպանական տեսանկյունից բոլոր փաստաթղթերը տեղին են, մենք անցել ենք համապատասխան բնապահպանական, շրջակա միջավայրի վրա ազդեցության փորձաքննությունը` օրենքի տառին համապատասխան, և որևէ խնդիր այստեղ լինել չի կարող։ Այն բոլոր մարդիկ, ովքեր կարծում են, որ այստեղ կա բնապահպանական խնդիր, ուղղակի զբաղված են պարզ շահարկմամբ»,-ասաց Քարամյանը: Հարցին՝ ճիշտ է, որ շահառուների վարկավորման պայմանները մի փոքր փոփոխվել են՝ ոչ ի օգուտ շահառուների, Քարամյանն ասաց, որ կա նման բան: Շահառուների խոսքով՝ «Վերածնունդ»-ում նրանք բնակարաններ ձեռք կբերեն 11 տոկոս տոկոսադրույքով: Ըստ Արման Քարամյանի, դա պայմանավորված է նրանով, որ ծրագրերի համար նախկինում կիրառված վերաֆինանսավորման գործիքը հանվել է: