Մի քիչ լուրջ չեք վերաբերվել զեկույցին. Մ. Հայրապետյանը` Նազենի Ղարիբյանին
Ազգային ժողովում գիտության, կրթության մշակույթի, սփյուռքի, երիտասարդության և սպորտի հարցերի մշտական հանձնաժողովում այսօր ներառված էր 2018թ. հունիսի 1-ին Կառավարության կողմից հավանության արժանացած Կառավարության ծրագրի կատարման ընթացքի և արդյունքների մասին զեկույցը: Նիստին ներկա Մշակույթի նախարարի պարտականությունները կատարող Նազենի Ղարիբյանի համոզմամբ՝ կառավարության քաղաքականությունը միտված է եղել մշակութային կյանքին հանրային ակտիվ մասնակցությունն ապահովելուն, մշակութային իրադարձությունների լայն քարոզչություն իրականացնելուն, մշակութային հաստատություններում քաղաքացիների հարաճուն հոսքին նպաստելուն: «Այս առումով, կես տարվա ընթացքում իրականացվել են 30 մրցույթ- փառատոններ, որից 24-ը միջազգային, 7-ը տեսարվեստի ցուցահանդես և 2-ը մրցանակաբաշխություն»: Ղարիբյանը հատուկ նշեց, որ Կառավարության հետևողականության շնորհիվ բացառվել է պատմամշակութային հուշարձաններ քանդելու դեպքերը: Նաև ավելացել է թանգարանների այցելուների թիվը: Ըստ Նազենի Ղարիբյանի՝ նախորդ տարվա համեմատ թիվն աճել է 121 000 մարդով»: Զեկույցն ավարտելուց հետո հանձնաժողովի նախագահ Մխիթար Հայրապետյանը դիմելով Ղարիբյանին նշեց. «Եթե անկեղծ լինեմ, ինձ մոտ տպավորություն կա էս մշակույթի հատվածից, որ մի քիչ լուրջ չեք վերաբերվել սրան»: Հայրապետյանը ասածը հիմնավորեց այսպես. «Այսօրինակ՝ «Կառավարության հետևողականության շնորհիվ բացառվել է պատմամշակութային հուշարձաններ քանդելու դեպքերը» հայտարարությունը դնել տեքստի մեջ որպես զեկույց և ներկայացնել պառլամենտին, արդյո՞ք արդյունավետ և նպատակահարմար եք գտնում»: Ի պատասխան պատգամավորի, Նազենի Ղարիբյանն ընդունեց քննադատությունը, բայց նշեց՝ տեքստը մենակ չէ գրել, այն մշակվել է նաև Կառավարության կողմից: «Նաև դեբատներ են եղել այս առումով, ինչը պետք է գրել, ինչը չգրել: Ամեն դեպքում ես ամբողջովին պատասխանատվությունը վերցնում եմ ինձ վրա, որևէ խնդիր չունեմ»: