Սա իմ հեղափոխությունը չի, սա իրենց հեղափոխությունն է. Նիկոլ Փաշինյան (տեսանյութ)
«Ա1+»-ի այն հարցին, թե ՀՀ քաղաքացին ինչպես է մասնակցելու տնտեսական հեղափոխությանը, բացի ՀԴՄ կտրոն պահանջելուց, Նիկոլ Փաշինյանը պատասխանեց, որ պետք է մարդկանց քաջալերեն, որպեսզի նրանք սեփական տնտեսական գործունեությունը ստեղծեն: «Օրինակ՝ Ռանչպար գյուղում ես տեսա բազմաթիվ չմշակվող հողեր, մեր խնդիրն է այնպես անել, որ այդ հողերը մշակելը մարդկանց համար լինի ձեռնտու: Այսինքն, նրանց վարկերի նկատմամբ հասանելի լինի, հետո նրանք հնարավորություն ունենան իրենց աճեցրած բերքը արժանապատիվ գներով հանձնել մթերող ընկերություններին: Մենք նաև հնարավորություն ենք ստեղծելու, որ մարդիկ մասնագիտական վերապատրաստում անցնեն: Հեղափոխությունից առաջ էլ, հետո էլ IT-ի ոլորտում մոտ 3000-400 թափուր աշխատատեղ կա: Մենք պետք է օգնենք մարդկանց, որպեսզի նրանք, ովքեր կարող են՝ վերապատրաստվեն և այդ կադրային թափուր տեղերը լրացնեն, որտեղ աշխատավարձները շատ բարձր են»: Վարչապետը հիշեցրեց՝ ինչպես քաղաքական հեղափոխությանը մասնակից եղավ քաղաքացին, այնպես էլ տնտեսականին պետք է լինի: «Մենք մարդուց ակնկալում էինք քաղաքական ակտիվություն՝ քաղաքական հեղափոխությունը իրականացնելու համար, հիմա էլ ակնկալում ենք տնտեսական ակտիվություն՝ տնտեսական հեղափոխություն իրականացնելու համար»: Կառավարությունը մարդկանց պիտի քաջալերի, միջավայր և պայմաններ ստեղծի տնտեսական հեղափոխությունն իրականացնելու համար: «Ես կասկած չունեմ, որ իրենք այդ գործողությունները կանեն, որովհետև սա իմ հեղափոխությունը չի, սա իրենց հեղափոխությունն է»: Մանրամասն՝ տեսանյութում: