Ոչ առաջին մտահոգիչ հայտարարությունն է, ոչ էլ վերջինը. Մարուքյանը՝ ԵԱՀԿ ՄԽ հայտարարության մասին (տեսանյութ)
ԱԺ «Լուսավոր Հայաստան» կուսակցության խմբակցության ղեկավար Էդմոն Մարուքյանը պնդում է, որ մարտի 6-ին Ազգային ժողովի և Կառավարության միջև տեղի ունեցած հարցուպատասխանի ժամանակ նախարարների ժամանակավոր պաշտոնակատարները ներկա են եղել հարցուպատասխանին, ինչի իրավունքը օրենքով չունեին: «Իրավունք չունեին մոտենալ ԱԺ ամբիոնին, ընդհանրապես ներկա գտնվել դահլիճում, բայց կարգը խախտվել է, ավելին՝ պատասխանել են պատգամավորների հարցերին, ինչը Սահմանադրության և ԱԺ կանոնակարգ օրենքի խախտում է, որովհետև հարցուպատասխանին մասնակցում են միայն կառավարության անդամները և միայն նրանք կարող են պատասխանել պատգամավորների հարցերին»: ԼՀԿ-ն դիմել է նաև Ազգային ժողովի նախագահին, որպեսզի Արտաքին հարաբերությունների հանձնաժողովը խումբը ձևավորի և մեկնի Սիրիա՝ հումանիտար առաքելությանը այցելելու և այնտեղ պայմաններն ուսումնասիրելու համար, ինչպես նաև խորհրդարանական վերահսկողություն իրականացնելու համար»: «Եթե երկրից զինվոր է դուրս գալիս, ինչ անունով էլ, որ դա լինի, պետք է անպայման ընթացակարգը պահպանվի, և պետք է անպայաման խորհրդարանի միջոցով այն անցնի, սակայն այս պարագայում, առաջին անգամ խորհրդարանը շրջանցվել է»: Մարուքյանը նշեց, որ այսօր տեղի է ունեցել Արտաքին հարաբերությունների և Պաշտպանության հանձնաժողովի միջև փակ նիստը, որտեղ քննարկվել է հարցը, բայց այն մերժվել է: Պատգամավորը անդրադառնալով օրեր առաջ ԵԱՀԿ Մինսկի խմբի համանախագահների հայտարարությանը, նշեց, որ այն մտահոգիչ է, ոչ առաջինն է, ոչ էլ վերջինը: Մարուքյանը կրկին հաստատեց, որ ԼՀԿ-ն աջակցում է իշխանության այն մոտեցմանը, որ Արցախը պետք է բանակցային կողմ դառնա: «Ամենամտահոգիչ ձևակերպումն այն է, որ ասվում է, թե ԼՂ իրավական կարգավիճակի ապագա որոշակիացում իրավաբանորեն պարտադիր կամքի արտահայտման միջոցով, սա ըստ էության հակասում է հայկական կողմի նախկինում պահված այդ սկզբունքային մոտեցմանը, որ Արցախի Հանրապետության քաղաքացիները 1991 թվականի դեկտեմբերի 10-ին հանրաքվեով ինքնորոշվել են և դա պարտադիր իրավաբանական ուժ ունի: Մեր կողմը միշտ սա պնդել է, որ սա տեղի ունեցած փաստ է, և կրկին պնդել, որ պետք է հանրաքվե անցկացնել, նշանակում է, որ հաշվի չառնել այդ հանրաքվեն»: Մարուքյանը համոզված է՝ սա Փաշինյան-Ալիև առաջին հանդիպմանը նախորդող հայտարարություն է, որով փորձ են արել կողմերին տարբեր ուղերձներ հղել: «Կան թե՛ մտահոգություններ, թե՛ ողջույնի խոսքեր, բայց մի բան ակնհայտ է՝ ադրբեջանական կողմը ողջունել է այս հայտարարությունը, զուտ այն հանգամանքի բերումով, որ ասվում է՝ ֆորմատի փոփոխության կամ ֆորմատում այլ կողմեր ներգարվելու միակողմանի նախաձեռնությունները չեն ողջունում»: