Հունան Պողոսյանն իրեն մեկ անգամ է խրախուսել
Սյունիքի մարզպետ Հունան Պողոսյանն «Ա1+»-ի հետ զրույցում հայտնեց, որ մեկ օրում իրեն երկու անգամ չի խրախուսել: Շրջանառվող լուրերի համաձայն՝ մարզպետը մեկ օրում իրեն երկու անգամ դրամական պարգեւատրում էր արել: Սյունիքի մարզպետն ասաց, որ մարզպետարանի պաշտոնական կայքում տեղադրված է, թե խոսքն ինչի մասին է: Կայքից տեղեկանում, ենք որ Հունան Պողոսյանը ոչ թե երկու անգամ, այլ երկու հոդվածներով եւ մեկ անգամ խրախուսել է մարզպետարանի աշխատակիցներին եւ պարգեւատրում ստացել են ոչ թե 22 հոգի, այլ Սյունիքի մարզպետարանի բոլոր աշխատակիցներն անխտիր ու հավասարապես՝ պաշտոնային դրույքաչափի 67,16 տոկոսի չափով: Ըստ կայքի՝ խրախուսանք կիրառում է տվյալ պաշտոնին նշանակելու իրավասություն ունեցող անձը, հետեւաբար, 22 հոգի խրախուսվել է մարզպետի կարգադրությամբ, մյուսները՝ մարզպետարանի գլխավոր քարտուղարի հրամանով: «Այս գործընթացը օրինականության սահմաններում է եւ ամեն տարեվերջի կիրառվում է՝ մարզպետարանի ծախսերի արդյունքում ունեցած խնայողությունների հաշվին: Ընդ որում, ՀՀ Սյունիքի մարզպետարանը 2018 թվականին իր խնայողություններից 8.8 մլն դրամ վերադարձրել է ՀՀպետական բյուջե»: Նախկին փոխոստիկանապետ Հունան Պողոսյանն անդրադառնալով ՀՀ ոստիկանապետի պաշտոնում իրեն նշանակելու մասին լուրերին, «Ա1+»-ին ասաց, որ ինքը Սյունիքի մարզպետն է եւ աշխատում է: