1920-ականների գերմանական կինոն՝ Երևանում

«Ֆիլմադարան» կինոմշակույթի զարգացման ՀԿ-ն և Երևանի «Գյոթե» կենտրոնը 2019թ.-ի հունվար-փետրվար ամիսներին երևանյան հանդիսատեսի ուշադրությանը կներկայացնեն 1920-ական թվականների գերմանական կինոյին նվիրված հատուկ ծրագիր: Համաշխարհային կինոյի գերմանացի մեծագույն վարպետների 5 լիամետրաժ և մի շարք կարճամետրաժ գլուխգործոցները կցուցադրվեն հունվարի 23-ից փետրվարի 27-ը՝ յուրաքանչյուր չորեքշաբթի՝ ժամը 19:30-ին, Երևանի «Գյոթե» կենտրոնում (Մհեր Մկրտչյան 1, հեռ.՝ 060 504712):

Հանդիսատեսը բացառիկ հնարավորություն կունենա դիտել ֆիլմեր, որոնք հատուկ այս առիթով թարգմանվել են հայերեն: Այս կինոնկարները մեծապես ազդել են կինոարվեստի հետագա զարգացման ու կայացման վրա և առայսօր պահպանում են իրենց ցնցող ազդեցությունը: Սա շատ բազմազան ծրագիր է, որի մեջ ընդգրկված են թե՛ դրամա և մելոդրամա, թե՛ լրտեսական մարտաֆիլմ, թե՛ սարսափ-ֆիլմ, թե՛ էքսպերիմենտալ ու վավերագրական ֆիլմեր:

Յուրաքանչյուր ցուցադրությունից առաջ ներածական խոսքով հանդես կգա «Ֆիլմադարան» ՀԿ-ի տնօրեն, կինոգետ, կինոռեժիսոր Գարեգին Զաքոյանը:

Բոլոր ցուցադրությունների մուտքն ազատ է:

Կցուցադրվեն հետևյալ ֆիլմերը՝

23/01/2019Բժիշկ Կալիգարիի աշխատասենյակը, ռեժ.՝ Ռոբերտ Վինե, 1920թ.

30/01/2019Վերջին մարդը, ռեժ.՝ Ֆրիդրիխ Վիլհելմ Մուռնաու, 1924թ.

06/02/2019Լրտեսներ, ռեժ.՝ Ֆրից Լանգ, 1928թ.

13/02/2019Պանդորայի տուփը, ռեժ.՝ Գեորգ Վիլհելմ Փաբսթ, 1929թ.

20/02/2019Գերմանական ավանգարդի կարճ ֆիլմերը, Վալթեր Ռութման/ Հանս Րիխթեր/ Վիկինգ Էգելինգ/ Օսկար Ֆիշինգեր, 1920-ական թթ.

27/02/2019Բեռլին՝ մեծ քաղաքի սիմֆոնիան, ռեժ.՝ Վալթեր Ռութման, 1927թ.