Ալեքսեյ Շորին շնորհվեց Երևանի պետական կոնսերվատորիայի պատվավոր դոկտորի կոչում
Երևանի պետական կոնսերվատորիայի պատվավոր դոկտորի կոչում է շնորհվել մալթացի կոմպոզիտոր Ալեքսեյ Շորին։ Դեկտեմբերի 12-ին կոնսերվատորիայի ռեկտորի պաշտոնակատար Սոնա Հովհաննիսյանն Ալեքսեյ Շորին հանձնեց դոկտորի կոչման հավաստագիրը։ Սոնա Հովհաննիսյանը նշեց, որ մեծ պատիվ է Ալեքսեյ Շորին հանձնել այս կոչումը։ «Մինչև իմ պաշտոնավարելը Երևանի պետական կոնսերվատորիայի նախկին ռեկտոր Շահեն Շահինյանը հիմք է դրել հետաքրքիր համագործակցության և կապերի, ինչի համար շնորհակալ եմ։ Ես շարունակելու եմ այդ ավանդույթը»,- նշեց տիկին Հովհաննիսյանը։ Ալեքսեյ Շորն իր երախտագիտությունը հայտնեց իրեն բարձր կոչման արժանացնելու համար։ Նա նշեց, որ արդեն մի քանի տարի համագործակցում է Հայաստանի պետական սիմֆոնիկ նվագախմբի, հայաստանյան այլ կոլեկտիվների և երաժիշտների հետ, որոնք մեծ վարպետությամբ են աշխարհի տարբեր երկրներում ներկայացնում իր երաժշտությունը։ Տեղեկացնենք, որ Ալեքսեյ Շորը 2018-2019 համերգաշրջանում Հայաստանի պետական սիմֆոնիկ նվագախմբի ռեզիդենտ կոմպոզիտորն է։ Եվ դեկտեմբերի 12-ին պետական սիմֆոնիկ նվագախումբը՝ դիրիժոր Սերգեյ Սմբատյանի ղեկավարությամբ, «Արամ Խաչատրյան» համերգասրահում ներկայացնելու է համերգային ծրագիր, որի մեջ ներառված են բացառապես Շորի ստեղծագործությունները։ Ընդ որում, երեկոյի ընթացքում կհնչի համաշխարհային պրեմիերա՝ Շորի Ջութակի կոնցերտը։ Հանդիպմանը ներկա էր նաև Մշակույթի աջակցության եվրոպական հիմնադրամի նախագահ Կոնստանտին Իշխանովը։ Ներկաները զրուցեցին մասնագիտությամբ մաթեմատիկոս Ալեքսեյ Շորի ստեղծագործական կյանքի, Հայաստանի հետ ունեցած նրա կապերի, Հայաստանի պետական սիմֆոնիկ նվագախմբի հետ համագործակցության մասին։ Նշենք, որ Ալեքսեյ Շորի հայրը տարիներ առաջ ապրել է Հայաստանում՝ Գյումրիում, և կոմպոզիտորը միշտ հաճույքով է գալիս մեր երկիր, այցելում Գյումրի։ Մշակույթի աջակցության եվրոպական հիմնադրամի նախագահ Կոնստանտին Իշխանովի հետ քննարկվեցին նաև կոնսերվատորիայի հետ համագործակցությանն առնչվող հարցեր։
