Սպասում ենք ՀՀ-Սփյուռք աննախադեպ գործակցության եւ համախմբման
Դեկտեմբերի 9-ին արտահերթ Ազգային Ժողովի ընտրություններում ժողովուրդը կողմ քվեարկելով հեղափոխությանը, ո'չ ասաց երկիրը թալանած նախկին իշխանություններին ու նրանց արբանյակներին Եվրոպայի հայերի համագումարը շնորհավիորում է հայրենի ժողովրդին եւ հեղափոխությունը առաջնորդող ուժին՝ ակնկալելով, որ հերթականությամբ կիրականացվեն ժողովրդի արդարացի սպասումներն ու երազանքները: Սփյուռքը նույնպես մեծ անձկությամբ հետեւում էր ընտրությունների ամբողջ ընթացքին եւ ճնշող մեծամասնությունը խանդավառությամբ եւ գոհունակությամբ ընդունեց ՀՀ պատմության մեջ ամենաժողովրդական ու ազատ խորհրդարանական ընտրությունների արդյունքները: Կարեւորը այն է, որ այսօր նոր էջ է բացվում հայության կյանքում եւ հնարավորություն՝ Հայաստան, Արցախ եւ Սփյուռք համատեղ գործակցությանը հաղորդելու նոր շունչ, նոր բովանդակություն եւ երանգ՝ ի խնդիր ինքնիշխան եւ արդար հայրենիքի կառուցման եւ համակողմանի զարգացման, ի խնդիր ժողովրդի բարեկեցության եւ համազգային իղձերի ու պահանջների իրականացման: Սպասում ենք Հայաստան-Սփյուռք աննախադեպ գործակցության եւ համախմբման: Եվրոպայի Հայերի Համագումար