Սպանություն Գյումրիում. կասկածվում է ռուսական ռազմաբազայի ծառայողը
«Ա1+»-ի տեղեկություններով, օրերս Գյումրիում մի կնոջ սպանության գործով կասկածվում է ռուսական ռազմաբազայի աշխատակիցը։ Ըստ ականատեսների՝ Գյումրիի Վարդանանց հրապարակի տարածքում ռուս զինվորականը ծեծի է ենթարկել փողոց մաքրող կնոջը, որն էլ ստացած վնասվածքներից մահացել է: Կինը հիվանդանոց է տեղափոխվել արդեն մահացած: Իրավապահներից ճշտում ենք դեպքի մանրամասները, ինչի մասին կհաղորդենք լրացուցիչ։ Այս պահին ճշտել ենք, որ փաստի առթիվ քննչական վարչությունում հարուցվել է քրեական գործ։ Ռուսաստանի դեսպանատան մամլո ծառայությունը, անդրադառնալով Հայաստանի քաղաքացու սպանության մեջ զինծառայողի մասնակցության վերաբերյալ հարցին, համարել է տեղեկատվությունը չստուգված և չհաստատված տվյալ: «Նման անպատասխանատու վարքագիծը, հատկապես ընտրությունների այս ոչ դյուրին շրջանում, ձեռնտու է այն ուժերին, որոնք ցանկանում են սեպ խրել Հայաստանի և Ռուսաստանի միջև առկա ռազմավարական և ավանդական բարեկամական հարաբերություններում»,- նշված է հաղորդագրության մեջ։