Ուրցաձորում արտահերթ ընտրություն կլինի
Կառավարության նոյեմբերի 15-ի նիստում չզեկուցվող հարցերի բաժնում է Արարատի մարզի Ուրցաձորի համայնքի ղեկավարի արտահերթ ընտրություն նշանակելու և անցկացնելու մասին հարցը: Կենտրոնական ընտրական հանձնաժողովի նախագահի 2018 թվականի հուլիսի 17-ի №26-Ա որոշմամբ սահմանված մոտակա օրն է 2019 թվականի փետրվարի 17-ը: Արարատի մարզի Ուրցաձոր համայնքի ղեկավարի արտահերթ ընտրության անցկացման համար առաջարկվում է այդ օրը: Հիշեցնենք, որ Ուրցաձոր համայնքի նախկին ղեկավար Ռաֆիկ Անդրեասյանին մեղադրում էին չարաշահումների մեջ՝ պահանջելով հրաժարական։ ՊՎԾ ղեկավար Դավիթ Սանասարյանի` Ուրցաձոր այցելությույունից հետո, հոկտեմբերի 9-ին նա հրաժարական է տվել: Ռաֆիկ Անդրեասյանը համայնքի ղեկավարի պաշտոնում ընտրվել էր 2016 թվականի սեպտեմբերի 18-ին: Արարատի մարզպետ Գարիկ Սարգսյանի որոշմամբ համայնքի ժամանակավոր պաշտոնակատար է նշանակվել Գևորգ Ավետիսյանը:
