Ազատություն. Սուրբ Հողի երեք հարանվանությունների պատրիարքները նամակով դիմել են Իսրայելի վարչապետին
Սուրբ Հողի երեք հարանվանությունների պատրիարքները նամակով դիմել են Իսրայելի վարչապետ Բենիամին Նեթանյահուին՝ պահանջելով չեղարկել Քնեսեթում քննարկվելիք օրինագիծը, որով հրեական պետությանը իրավունք է վերապահվում բռնագրավել եկեղեցապատկան կալվածքները: Ըստ այդ օրինագծի, Քնեսեթում նաև նոր հանձնաժողով է ստեղծվելու, առանց որի թույլտվության քրիստոնեական պատրիարքարանները հողերի վարձակալում չեն կարող իրականացնել: Երուսաղեմի Հայոց պատրիարքարանի դիվանապետ հայր Կորյուն վարդապետ Բաղդասարյանն իր ֆեյսբուքյան էջում գրառում էր կատարել, մասնավորաբար նշելով, որ «Հոգևոր Պետերը օրինագիծը անվանել են ամոթալի և նամակում հիշեցրել են տիար Նեթանյահուին, որ հուլիս ամսին Հոգևոր Պետերին ուղղուած իր նամակում նա վստահեցրել էր վերջիներիս, որ օրինագիծը պետք է հետ կանչվի»: Քնեսեթում «Քուլանու» կուսակցության անդամ, պատգամավոր Ռախել Ազարիան է օրինագծի հեղինակն ու իր համոզմամբ եկեղեցական հողերի մասին օրենքը գալիս է պաշտպանելու Երուսաղեմի այն բնակիչներին, որոնք բնակվում են եկեղեցապատկան հողերի վրա ու հողերի վաճառքի պատճառով չեն մնա դրսում: Տիկին Ազարիան իր տեսակետը ներկայացրել էր դեռևս հունիս ամսին հրեական «Ջերուսալեմ Պոստ» հեղինակավոր հանդեսին տված հարցազրույցում: Մարտ ամսից մինչև օրս այս խնդիրը դեռ չի լուծվել ու թե՛ Նեթանյահուի, թե՛ տարածքային կառավարման նախարար Ցախի Հանեգբիի հայտարարություններին հակառակ տիկին Ազարիան շարունակում է որոշակի փոփոխություններով քրիստոնյաների հողերի բռնագրավման հետ կապված իր նախագիծը քննարկման բերել: Ավելին՝ այստեղ