Կառավարությունում պղնձաձուլականի աշխատակիցներն ասել են, որ կգնան առավել ծայրահեղ քայլերի (տեսանյութ)
Մոտ 2 ժամ առաջ Կառավարությունում ավարտվել է փոխվարչապետի պաշտոնակատարի գրասենյակի ղեկավար Վարագ Սիսեռյանի և Ալավերդու Պղնձաձուլական գործարանի աշխատակիցների հանդիպումը: Վերջիններս Կառավարություն էին գնացել՝ իրենց աշխատատեղերը չկորցնելու պահանջով: 1,5 ժամ տևած հանդիպման ընթացքում փոխվարչապետի գրասենյակի ղեկավարն ասել է, որ Կառավարությունն անում է ամեն բան, որպեսզի գործարանը պահպանվի և միջանկյալ դադար չլինի:
Քննարկվում է նաև նոր պղնձաձուլարանի կառուցման նախագիծը: Հանդիպման ընթացքում գործարանի աշխատակիցներն ասել են, որ իրենք պատրաստ են առավել ծայրահեղ քայլերի դիմելու: Եվ աշխատանքը չկորցնելու հետ կապված իրենց պահանջը չբավարարելու դեպքում անգամ կգնան հացադուլի:
Հիշեցնենք, որ այսօր կառավարությունում պետք է կայանար փոխվարչապետի պաշտոնակատար Տիգրան Ավինյանի և «Էյ Սի Փի» ընկերության սեփականատեր Վալերի Մեջլումյանի երկրորդ հանդիպումը: Հանդիպումը հետաձգվել է և կկայանա երկուշաբթի օրը՝ հոկտեմբերի 22-ին: Վարագ Սիսեռյանը խոստացել է, որ հանդիպման ավարտից հետո, երբ արդեն պարզ կլինեն հետագա անելիքները, ավելի կոնկրետ պատասխան կտրվի:
Անկյուն+3 ՀԸ
