Տպագիր մամուլը չի մեռնի. Հակոբ Ավետիքյան (տեսանյութ)
Այն կարծիքը, թե տպագիր մամուլը կվերանա, «Ազգ» թերթի խմբագիրը չափազանցված է համարում: Չնայած տարեց- տարի տպաքանակի նվազման հետ՝ «Ազգը» օրաթերթից վերածվել է շաբաթաթերթի: Հակոբ Ավետիքյանը համարում է, որ տպագիր մամուլի դերը շարունակում է մնալ մեծ։ «Տպագիր մամուլը չի մեռնի: Տպագիր մամուլը իր պատմության ընթացքում հեռուստատեսությունից, ռադիոյից բազմաթիվ հարվածներ է ստացել և որոնցից տուժել է՝ ընթերցողներ, եկամուտներ, գովազդներ է կորցրել»: Հակոբ Ավետիքյանը մնում է այն կարծիքին, որ թերթ կարդացողն այլ որակ ունի: Ըստ նրա՝ տպագիր մամուլը ընթերցողին մտածելու հնարավորություն է տալիս: «Այն քաղաքացին, որն ամեն առավոտ կամ գոնե շաբաթը մեկ անգամ, 200 դրամ է վճարում և թերթ է կարդում, դա այլ որակ ունեցող քաղաքացի է: Այսօրվա Տպագիր մամուլի պարտականությունն է գնալ մեկնաբանության ճանապարհով, վերլուծության ճանապարհով, հետաքննության ճանապարհով: Եթե սա ապահովեց, կնշանակի իր տեղը կպահպանի»: Թերթեր սկսեցին քիչ կարդալ ոչ միայն էլեկտրոնային մեդիայի ի հայտ գալով, ասում է Հակոբ Ավետիքյանը։ Խնդիրը նաեւ այն տարածելու մեջ է: Ըստ խմբագրի, մամուլի կրպակները դարձել են այլ ապրանքների վաճառակետեր։ «Կիոսկներն օգտվում են իրենց տրված առանձնաշնորհից, նրանք ստեղծված են մամուլ տարածելու համար, բայց չեն անում, սիգարետ, արևածաղիկ են վաճառում»: Հայաստանում հոկտեմբերի 16-ը նշվում է որպես Հայ մամուլի օր: Հայ մամուլի պատմությունը սկսվում է 1794 թվականի հոկտեմբերի 16-ին, երբ Հնդկաստանի Մադրաս քաղաքում լույս տեսավ հայկական առաջին պարբերականը՝ «Ազդարար»-ը: