Արևաշատ-Աբովյան ավտոճանապարհը վերականգնվել է

Արևշատ-Աբովյան ճանապարհի մոտ 1,5 կիլոմետրանոց ճանապարհահատվածում ավարտվել են վերականգնման աշխատանքները։ Ճանապարհահատվածի 1,3 կմ-ն անցնում է Արարատի մարզի Աբովյան համայնքով, իսկ մոտ 200 մետրը՝ Արևշատ համայնքով։ Շինարարական աշխատանքները կատարել է «Արարատ ճանշին» ՍՊ ընկերությունը։ «Տրանսպորտային ծրագրերի իրականացման կազմակերպություն» ՊՈԱԿ-ի կողմից ստեղծված աշխատանքային հանձնաժողովը նշված ճանապարհահատվածում իրականացրել է դիտարկում ավարտված շինարարական օբյեկտի համապատասխանությունը նախագծանախահաշվային փաստաթղթերին պարզելու նպատակով։ Հանձնաժողովն ուսումնասիրել է կատարողական փաստաթղթերը, գծագրերը, տեղում կատարել ճանապարհահատվածի զննում, ստուգիչ չափումներ։

«Տրանսպորտային ծրագրերի իրականացման կազմակերպություն» ՊՈԱԿ-ի աշխատակիցները եղան նաև Դիտակ-Ջրաշեն ավտոճանապարհի վերականգնվող մոտ 2,1 կմ ճանապարհահատվածում։ Այստեղ վերականգնման աշխատանքներն ավարտական փուլում են։

Ջրաշեն համայնքի բնակիչ Գեղամ Վարդանյանն իր երախտագիտությունն է հայտնում ճանապարհը վերականգնողներին։ «Չեք պատկերացնում՝ ինչ վիճակում էր գտնվում ճանապարհը։ Նույնիսկ մոռացել ենք, թե վերջին անգամ երբ էր այն վերանորոգվել, երևի մի 50 տարի առաջ։ Փոխվել են ամբողջ ջրագծերը։ Պետք է նաև հոգատար լինենք, խնամքով վերաբերվենք ճանապարհին, որպեսզի ավելի երկար ծառայի մեզ»,- ասաց Ջրաշենի բնակիչը։

Նշենք, որ ճանապարհահատվածները վերականգնվել են Համաշխարհային բանկի աջակցությամբ իրականացվող Կենսական նշանակության ճանապարհային ցանցի բարելավում ծրագրի լրացուցիչ ֆինանսավորում ծրագրի շրջանակներում, իսկ աշխատանքների պատվիրատուն «Տրանսպորտային ծրագրերի իրականացման կազմակերպություն» ՊՈԱԿ-ն է:

 

«Տրանսպորտային ծրագրերի իրականացման կազմակերպություն» ՊՈԱԿ