Ովքե՞ր են գլխավորում Ժառանգություն կուսակցության ցուցակը (տեսանյութ)
Մի քանի ժամից տեղի կունենա Ժառանգություն կուսակցության լիագումար նիստը, որի ընթացքում կորոշվի Երեւանի ավագանու ընտրությունների ցուցակի առաջին հորիզոնականները, այսօր հայտարարեց Ժառանգություն կուսակցության հիմնադիր Րաֆֆի Հովհաննիսյանը: «Այս պահին քննարկվում է իմ, Արմեն Մարտիրոսյանի եւ մեկ այլ մարդու թեկնածություն, որի անունը դեռ նշել չեմ կարող: Մեր թեկնածուները միայն կուսակցական չեն լինի, այլ նաեւ հասարակական սեկտորից: Մենք ակնկալում ենք ազատ եւ արդար ընտրություններ, որտեղ կբացակայեն ընտրակեղծիքները եւ պետական ռեսուրսը չի օգտագործվի ընտրությունների ընթացքում»: Րաֆֆի Հովհաննիսյանը նշեց, որ երկար տարիներ եղել են ընդդիմադիր, հիմա սակայն՝ ոչ ընդդիմադիր են, ոչ իշխանություն։ «Ժառանգությունը կշարունակի իր սկզբունքային մոտեցումը՝ քաղաքացու ինքնիշխանություն, պետական իշխանություն եւ ազգային շահ: Եթե կան այս համընկնումները մենք սիրով կհամագործակցենք»: Անդրադառնալով վարչապետ Նիկոլ Փաշինյանի ելույթին, Րաֆֆի Հովհաննիսյանը նշեց. «Վարչապետի ելույթը ուշագրավ էր, զգացմունքային: Նա ավելի շատ պատասխանում էր ռեպլիկների, որոնք եղել էին տարբեր դաշտերից: Կառավարության 100 օրը գնահատում ենք դրական եւ մենք հայտնում ենք մեր զորակցությունը այս կառավարությանը: Այս օրերի կառավարության գործողությունները եղել են զգացմունքային, այն եղել է հաճո քաղաքացուն, հիմա պետք է ավելի դանդաղ, սառնասիրտ քայլերով շարունակի իր գործունեությունը, եւ կտեսնենք այսուհետ ավելի հստակ քայլեր թե արտաքին եւ թե ներքին քաղաքական կյանքում»: Ռոբերտ Քոչարյանի քաղաքական դաշտ վերադառնալու մեջ Րաֆֆի Հովհաննիսյանը վտանգ չի տեսնում: «Քոչարյանին մեղադրելու հիմք կա, եւ այն պետք է ապացուցվի: Որոշումը պետք է կայացնի դատարանը: Իր վերադարձի մեջ քաղաքական վտանգ չկա, անհարկի խուճապի կարիք չկա»,-ասաց նա: Անցումային արդարադատության համակարգի մասին խոսելով Րաֆֆի Հովհաննիսյանը նշեց, որ պարզ չէ ինչ համակարգ է եւ ինչպես պետք է աշխատի: Պետական ողջ մարմինը պետք է ենթարկվի լյուստրացիայի, պետական մարմինները, պետք է բացվեն եւ հրավիրվեն դատաքննության: