Դրսում մեդալների են արժանանում, իսկ ներսում մարզվում անբավարար պայմաններում (տեսանյութ)
Ջրացատկորդների համար Հայաստանում մարզման պայմանները բավարար չեն։ Նրանք մարզվում են Դավիթ Համբարձումյանի անվան ջրացատկի օլիմպիական մարզադպրոցում, սակայն այդ լողավազանը հին է, հարմարեցված միայն մեկ պտույտով ցատկեր կատարելու համար: Ջրացատկի Հայաստանի ազգային հավաքականի գլխավոր մարզիչ Հրաչյա Չանդիրյանը նկատում է, որ ստիպված են լինում զուգահեռ 3, 4 պտույտով թռիչքները մարզել դահլիճում: Իսկ ամբողջական ցատկը հաջողացնում են հղկել միայն մրցումների վայրում, թույլատրվող երկու մարզման ընթացքում: Բայց սա չի խանգարել արդյունք գրանցել միջազգային առաջնությունում։ Հայ ջրացատկորդներ Լև Սարգսյանը և Վլադիմիր Հարությունյանը օրերս 10 մետր սինքրոն աշտարակացատկ մրցաձևում Եվրոպայի առաջնության բրոնզե մեդալակիր են դարձել: «Անկախ Հայաստանի տարիներին, լողավազանի փակվելուց հետո ջրային մարզաձևերը վերացան, տարիներ անց այս հաջողությունն առաջին ծիծեռնակն էր», - ասաց գլխավոր մարզիչ Հրաչյա Չանդիրյանը: Վլադիմիր Հարությունյան-Լև Սարգսյան զույգը զիջել է միայն Ռուսաստանը եւ Մեծ Բրիտանիան ներկայացնող զույգերին։ Այս արդյունքներն աննախադեպ են անկախ Հայաստանի համար: Ռուսաստանում բնակվող ջրացատկորդ, 21-ամյա Լև Սարգսյանի խոսքով, իրենց ելույթով զարմացրեցին Եվրոպայի այս մարզաձևի էլիտային: «Մենք ապացուցեցինք, որ կարող ենք մրցակցային լինել, այնտեղ բոլորը զարմացած էին, որ կարողացանք այդպիսի աշխատանք կատարել», - ասաց մարզիկը: 20-ամյա Վլադիմիր Հարությունյանը նշեց, որ շարունակելու են աշխատել և հաջողությունների հասնել: Լև Սարգսյանը Եվրոպայի առաջնությանը նաև անհատական մարզաձևում է ելույթ ունեցել՝ զբաղեցնելով 7-րդ տեղը: Առաջին երկու ցատկից հետո շանսերը մեծ էին, սակայն հետո երկու ցատկ անհաջող կատարեց: Գլխավոր մարզչի խոսքով, 2019-ի աշխարհի առաջնության ժամանակ կփորձեն Օլիմպիական խաղերի ուղեգիր նվաճել: Այդ նպատակին հասնելու համար առաջնությունից առաջ պետք է այլ երկրում ուսումնամարզական հավաք անցկացնեն, ինչի համար ֆինանսական միջոցներ են անհրաժեշտ: Ֆեդերացիային տարեկան մոտ 25,000 դոլար է տրամադրվում, ինչը բավարար չէ: