Քոչարյանն այն մարդկանցից չէ, որ մենակ խորտակվի, նա անուններ կտա. Արա Պապյան (տեսանյութ)
Մեր Սահմանադրությունն ասում է, որ Հանրապետության նախագահն անձեռնմխելի է, բայց կա նախապայման. Ռոբերտ Քոչարյանն անձեռնմխելի է՝ իր կարգավիճակից բխող գործողությունների համար, ասում է «Մոդուս Վիվենդի» կենտրոնի ղեկավար Արա Պապյանը։ «ՀՔԾ-ն սխալ վարվեց այն առումով, որ բավական վիճելի մեղադրանք ներկայացրեց: Կարծում եմ հետո այլ մեղադրանք կարելի է ներկայացնել, որն ավելի հեշտ ապացուցելի է՝ ասենք ապօրինի հարստացում»: Արա Պապյանը Ռոբերտ Քոչարյանի ասուլիսի տապալումը սխալ է համարում: «Քոչարյանն այն մարդկանցից չէ, որ մենակ խորտակվի, նա անուններ կտա։ Հասարակությունը պետք է իմանա մարտի 1-ի մասին ողջ ճշմարտությունը»։ Արա Պապյանը չի կարծում, որ ասուլիսի տապալումը գործող իշխանության կողմից է ուղղորդվել, նրա լսած մեկ այլ կարծիքի համաձայն էլ՝ հենց Քոչարյանի կողմից է ուղղորդվել, որ նա հարցերին չպատասխանի: «Եթե Ռոբերտ Քոչարյանը ցանկանա խոսել, ապա այսօր էլ կարող է կազմակերպել ասուլիս, իր առանձնատուն հրավիրել լրագրողներին, ուղիղ եթեր մտնել, և հարցերի պատասխանել»: Դատավարությունը պետք է լինի արդար և մրցակցային, ասում է Արա Պապյանը: «Ես վստահ եմ, որ դատարանը ինչ որոշում էլ կայացնի, հասարակության մի զգալի մասը չի ընդունելու: Եթե արդարադատությունը հեռախոսային զանգով լիներ, ապա Քոչարյանին բաց չէին թողնի»,-ասաց նա:
