«Լուսավոր Հայաստան»-ը չի շտապեցնում իր գործընկերներին , բայց անգործ էլ չի մնում (տեսանյութ)
Օգոստոսի 2-ին Երեւանի ավագանու «Ելք» խմբակցության անդամները «Սանիտեկ» ընկերությանը ներկայացրել են աղբահանությունը պատշաճ իրականացնելու պահանջ: « «Սանիտեկ»-ը մեր պահանջին պատասխանել է նամակով եւ բերել է փաստարկներ, որոնք մենք միշտ լսել ենք: Փոխարենը կարող էր ուղարկել սպիտակ թուղթ, վրան գրված՝ կրկնում են իմ նախորդ ասածները»,- ասում է Երեւանի ավագանու «Ելք» խմբակցության անդամ Անի Սամսոնյանը: Լուծումը թաքնված է տարիներ առաջ տեղի ունեցած գործարքում, հավելում է Երևանի ավագանու «Ելք» խմբակցության ղեկավար Դավիթ Խաժակյանը: Ըստ նրա, ի սկզբանե նախատեսված է եղել Երեւանը բաժանել երկու մասի, հայտարարել մրցույթներ եւ քաղաքի աղբահանության գործառույթը հանձնել 2 տարբեր օպերատորների: Արդյունքում պայմանագիր կնքվեց միջազգային «Սանիտեկ» ընկերության հետ, որը գրանցված է Բեյրութում, իսկ երկրորդ կազմակերպության համար այդպես էլ մրցույթ չհայտարարվեց: «Բայց որպեսզի լիներ 2 իրավաբանական անձ, գրանցեցին «Սանիտեկ Ինթերնեյշնլ» ընկերությունը , որը գրանցված է Հայաստանում եւ հանդիսանում է այլ իրավաբանական անձ, բայց պայմանագրերի տակ ստորագրող, կնքող անձը նույնն է: Եվ այս ընկերությունն է իրականացնում ամբողջ քաղաքի աղբահանությունը եւ սանմաքրումը», -ասաց նա: Դավիթ Խաժակյանն առաջարկում է խզել պայմանագրերից մեկը եւ հայտարարել նոր միջազգային մրցույթ, ներգրավել նոր օպերատորի, որը կիրականացնի աղբահանումը քաղաքի մյուս կեսում: «Սա հնարավորություն կտա մոնոպոլիան վերցնել«Սանիտեկ»-ից եւ ստեղծել մրցակցային դաշտ: Նրանք կմրցեին միմյանց հետ, և մենք կհասկանայինք, որ քաղաքի մի կեսում խնդիրները շատ են, իսկ մյուսում դրանք չկան, ապա այդ խնդիրները կապված են վատ կառավարման հետ»: Դավիթ Խաժակյանը հավելեց, որ այս առաջարկը պատրաստվում են ներառել իրենց նախընտրական ծրագրում, քանի որ գործող քաղաքային իշխանությունը, որն ամիսներ անց չի լինելու, դժվար թե կարողանա այն կյանքի կոչել: Իսկ «Ա1+»-ի հարցին ի պատասխան, թե ինչ ձեւաչափով են մասնացելու առաջիկա Երեւանի ավագանու ընտրություններին, Դավիթ Խաժակյանը նշեց. «Դեռեւս վերջնական որոշում չկա: Թե «Լուսավոր Հայաստան», եւ թե «Հանրապետություն» կուսակցությունները հայտարարել են, որ եթե «ՔՊ»-ն որոշի առանձին ցուցակով մասնակցել ընտրություններին, ապա մենք պատրաստակամ ենք 2 կուսակցությունով դաշինք կազմել եւ քննարկում ենք Արդարադատության նախարար Արտակ Զեյնալյանի թեկնածությունը: Մենք մեր գործընկերներին չենք ցանկանում շտապեցնել, բայց եւ չենք ցանկանում անպատրաստ մասնակցել ընտրություններին, դրա համար նախապատրաստական աշխատանքներն ընթացքի մեջ են: Եվ եթե որոշում կայացվի՝ «Ելք» դաշինքի ձեւաչափը կմեկտեղվի, իսկ եթե ոչ, ապա մեր ծրագրերը հանդես կգան որպես ինքնուրույն քաղաքի զարգացման ծրագրեր»,-ասաց նա:
