Նոր շանս նոր իշխանության համար
Ես չեմ ընկալում Հայաստանի նոր իշխանությունների առաջարկը, որ Արցախը բանակցային կողմ լինի։ Այս գաղափարն առաջ է քաշվել շատ առաջ, ասում է Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը։
«2012-ից բանակցային ռեալ պրոցես չկա։ Նոր իշխանության դեպքում շանս է բացվում բանակցային պրոցեսը վերականգնելու համար։ Սերժ Սարգսյանը երբեք չէր կարողանալու Արցախի հարցը լուծել, քանի որ լեգիտիմ չէր, իսկ Նիկոլ Փաշինյանը լեգիտիմ է»,- ասում է կենտրոնի ղեկավարը։
Ադրբեջանն այս պահին սպասողական դիրքորոշում ունի, ասում է քաղաքագետ Երվանդ Բոզոյանը։
«Սխալ է այն միտքը, թե Ադրբեջանը կվախենա արտաքին ազդեցությունից եւ չի դիմի գործողությունների։ Եթե նրանք զգան, որ հաջողության կհասնեն, ապա առանց հապաղելու պատերազմ կսկսեն։ Մենք չպետք է թույլ տանք, որ բանակցային այս պաուզան Ադրբեջանն օգտագործի իր օգտին», -ասում է քաղաքագետ Երվանդ Բոզոյանը։
Հայաստանում սկսվեց կոռուպցիայի դեմ պայքար նաև բանակում եւ Ադրբեջանը սկսեց զգուշանալ եւ մտահոգվել, ասում է Ստեփան Գրիգորյանը։
«Պետք է պատրաստ լինենք Ադրբեջանի անսպասելի քայլերին։ Բայց նրանք չպետք է մոռանան, որ Սերժ Սարգսյանին փոխարինել է Փաշինյանը։ Ռուսները շատ կոմպրոմատներ ունեն Սերժ Սարգսյանի հանդեպ, իսկ Նիկոլ Փաշինյանն այդ պրոբլեմը չունի»։
