«Գրիչները կմնան պատմության մեջ». փոփոխություններ ԸՕ-ում
Ընտրական օրենսգրքում փոփոխությունների առաջին փաթեթը վերաբերում է ընտրակարգին: ՀՀ վարչապետին առընթեր ընտրական օրենսդրության բարեփոխումների հանձնաժողովի քարտուղար Դանիել Իոաննիսյանը նշում է. «Հիմնականում 2 առաջարկ է քննարկվում, առաջինը համապետական ռեյտինգային ցուցակն է, մյուսը` համամասնական փակ ցուցակը: Հաշվի առնելով քաղաքացիական հասարակության մտահոգությունները՝ մենք սատարում ենք սովորական փակ համամասնական ցուցակները»: Դանիել Իոաննիսյանը կարևորում է ընտրախախտումների կանխման, կրկնաքվեարկությունները բացառելու մեխանիզմները: «Քաղաքացին, որ գնում է ընտրական տեղամաս, պետք է կասկած չունենա, որ իր քվեն անցնելու է, և ոչ մի կեղծիք տեղի չի ունենալու: Սա կարևոր է ոչ միայն այն առումով, որ ընտրություններն առանց կեղծիքների անցնեն, այլ նաև, որ ընտրությունների նկատմամբ հանրության վստահության մակարդակը բարձր լինի»: Քաղաքացին ոչ թե նշումով պետք է ընտրի իր ցանկացած կուսակցությանը, այլ պարզապես կվերցնի այդ կուսակցության քվեաթերթիկը, սա քննարկվող տարբերակներից մեկն է: «Այսպես մենք կձերբազատվենք գրիչներից, գոնե ԱԺ ընտրությունների ժամանակ, ինչը նշականում է այդ կարմիր, կանաչ գրիչները մնում են պատմության մեջ»,-ասում է Դանիել Իոաննիսյանը: ԱԺ «Ծառուկյան» խմբակցության պատգամավոր Սերգեյ Բագրատյանը պնդում է՝ պետք է վերացնել ռեյտինգային ընտրակարգը: «Մենք 100% համամասնականի կողմնակից ենք և բացառում ենք վարկանիշային քվեարկությունը»։ ՀՅԴ կուսակցության անդամ Լուսինե Հովհաննիսյանը նշում է. «Մենք եւս առաջարկում ենք ռեյտիգանյին կարգից հրաժարվել, առաջարկում ենք բաց ցուցակներով կազմակերպել ընտրությունը: Ամբողջ հանրապետությունը դիտարկել մեկ ընտրատարածք եւ ընտրողը իր քվեն տալով , հնարավորություն է ստանում տվյալ կուսակցության ցուցակում ընտրված անձի նկատմամբ իր նախասիրությունն արտահայտել»: Հիշեցնենք, որ ԱԺ 4 խմբակցություն պատրաստակամություն են հայտնել սկսել քննարկումներ Ընտրական օրենսգրքի փոփոխությունների շուրջ, ձևավորվել է աշխատանքային խումբ` յուրաքանչյուր խմբակցությունը ներկայացնող քաղաքական ուժից երեքական ներկայացուցիչ ձևաչափով: Աշխատանքային խմբի հաջորդ քննարկումը տեղի կունենա հուլիսի 4-ին: