«Կառավարությանը պետք է ժամանակ տալ». Վաչե Գաբրիելյան (տեսանյութ)

Բարձրագույն և հետբուհական կրթության մասին օրենքի նոր նախագծով  բուհերի  կառավարման խորհուրդները պետք է լինեն ապակուսակցական։ Հայաստանի պետական տնտեսագիտական համալսարանի ռեկտոր Կորյուն Աթոյանը ողջունում է այդ փաստը։

«Կուսակցականացված երբեք չպետք է լինեն բուհերը, կրթության համակարգը։ Քաղաքականացված լինում են, քանի որ քաղաքական ծրագրեր են կատարում, բայց կուսակցականացված լինելը անընդունելի է»,- նշում է նա։

Հայաստանի պետական տնտեսագիտական համալսարանում այսօր քննարկվում էր  2018-23 թթ. զարգացման ռազմավարական ծրագիրը։ Այսօր արդեն խնդիր է  բուհերի համար այս տարվա դիմորդների թիվը։ 12 -ամյա կրթական համակարգի անցման արդյունքում կտրուկ նվազել է  շրջանավարտների  թիվը։ ՀՊՏՀ դիմորդների թիվը կրկնակի է նվազել` 462 դիմորդ` նախորդ տարվա 966-ի փոխարեն: Ռեկտորը վստահեցնում է, որ  նախօրոք է մտածել և ֆինանսական պահուստներ են  ձևավորել։

Քննարկմանը մասնակցում էր նաև  համալսարանի կառավարման խորհրդի նախագահ  Վաչե Գաբրիելյանը։

«Գիտական խորհուրդը տվել է ցուցումներ, որ ռեկտորատը մշակի ռազմավարական ծրագիրը։ Այդ ծրագրում հաշվի ենք առնել, թե ինչպես կարող ենք բարձրացնել որակական ստանդարտները,  ինչպես անցնել գնահատման ավելի արժանահավատ համակարգի, ինչպես դասախոսական կադրերը թարմացնենք և այլն»,- ասաց նա։

Նախկին փոխվարչապետը դրական գնահատեց նաև ներկայիս կառավարության աշխատանքը։

«Նախաձեռնություններն ու ոգևորությունը ինձ դուր է գալիս, եռանդը կա, իսկ կառավարությանը պետք է ժամանակ տալ։ Երկու ամիսը շատ քիչ ժամանակահատված է, որ կարողանանք դատողություններ անել կառավարության մասին»,- ասում է նա։

Վաչե Գաբրիելյանին  առաջարկվել է մնալ կառավարությունում, սակայն նա նպատակահարմար չի համարել այս պահին։   Նա ողջունում է, որ  ներկայիս կառավարությունը նախորդի մի շարք ծրագրեր շարունակում է իրագործել։