Քաղաքային իշխանությունները կռիվ են գցել Հյուսիսային պողոտայում (տեսանյութ)
Հյուսիսային պողոտայի հանրային մի հատվածի համար վիճաբանություն է սկսսվել «90 քմ տարածքով սրճարան պետք է շահագործեն: Սա նաեւ շենքի բնակիչների անցուղի է, ճանապարհ է, այստեղ գտնվում է նաեւ շենքի հակահրդեհային մուտքը: Եթե վթար եղավ, արտակարգ իրավիճակների նախարարության ներկայացուցիչները չեն կարողանալու մոտենալ»,- ասում է «Սինաբոն» սրճարանի տարածքի սեփականատեր եւ հարակից շենքի բնակիչ Նիկոլայ Դանիելյանի ներկայացուցիչ, փաստաբան Էդգար Բադեմյանը: Խոսքը պողոտայի 8 եւ 10 շենքերի միջակայքի հանրային տարածքի մասին է։ Խնդիրն էլ նոր չէ, արդեն երկու տարվա պատմություն ունի։ Դեռ ավելին, այս հարցով Վարչական դատարանը նախորդ տարվա վերջին որոշում է կայացրել՝ «Cinnabon»-ն ընդդեմ Քաղաքապետարանի հայցով, որով երրորդ կողմ էր ներգրավված «Սիմփլ Դիլ» ընկերությունը։ «Որոշեց «Սիմփլ Դիլ» կառուցապատող ընկերությանը արգելել որեւէ սրճարանային գործունեություն իրականացնել: Այդ թվում՝ պարտավորեցրեց Երեւանի քաղաքապետարանին հետամուտ լինել, որպեսզի հետագայում նմանատիպ օբյեկտներ չկառուցվեն եւ շահագործվեն եւ չիրականացվի այդ չափսերով»,- նշում է փաստաբանը: Հայցում, որը բավարարվել է, նշել էր՝ «Ֆրանս» սրճարանի գործունեությամբ ոտնահարվել են իրենց իրավունքները։ Չնայած այս որոշմանը՝ Երևանի քաղաքապետարանի աշխատակազմի առևտրի և սպասարկման վարչության պետ Արման Եդոյանը այս տարվա ապրիլի 3-ին պայմանագիր է կնքել արդեն այլ ընկերության՝ «Մուդ» ՍՊԸ-ի հետ` համապատասխան վարձավճարի դիմաց՝ 92 քմ տարածքն օգտագործելու համար: Ընդ որում՝ «Մուդ» ՍՊԸ-ի հիմնադիրը եւ բաժնետերը՝ Ալվարդ Սահակյանը դատական վիճաբանության պատասխանող կողմի «Սիմփլ դիլ» ՍՊԸ-ի սեփականատեր Գևորգ Ադամյանի մայրն է: Ըստ փաստաբանի՝ ներկայիս ընկերությունը փորձում է շահարկել այն հարցը, որ վճիռը կայացվել է «Սիմփլ Դիլ» ընկերության վերաբերյալ. «Մեր Քաղաքացիական եւ Վարչական դատավարության օրենսգրքերը ունեն սկզբունք եւ արգելվում է, որ վերացական անձի նկատմամբ որոշում կայացվի, տվյալ պահին ում կողմից է կատարվում իրավախախտումը, նրա կողմից է կանխիչ վճիռ կայացվում»: «Մուդ» ՍՊԸ-ի սեփականատիրոջ ներկայացուցիչ Կարեն Մեժլումյանը փոխանցեց, որ դատարանի որոշումը վերաբերում է այլ ընկերության, բացի այդ կոնստրուկցիաները տարբերվում են նախորդից: Ըստ փաստաբանի՝ եթե մյուս ընկերությունը խնդիր է տեսնում, կարող է դիմել դատարան: