«Դրսում կանգնելու համար բարդել են երկու եւ ավելի անձանց սպանություն» (տեսանյութ)
Արդեն 21 տարի անազատության մեջ գտնվող Արթուր Կիրակոսյանն անմեղ է,- ասում է պաշտպանը։ «Այս 21 տարիների ընթացքում մոտ 10 վճռաբեկ բողոք եմ ներկայացրել, տարին մեկ, երկու տարին մեկ վճռաբեկ բողոք եմ տարել: 5 հատորների ցուցմունքների վրա բառացի հենվելով ապացուցել եմ, որ նա ոչ միայն չի սպանել երկու եւ ավելի անձանց, այլ ընդհակառակը նրա հետ մասնակցող անձը, որը եղել է ռեցիդիվիստ, ցուցմունք է տվել, որ ինքը մտել է տուն եւ սպանել ամուսիններից մեկին»,- «Ա1+»-ին ասաց փաստաբան Ռուզաննա Տեր-Վարդանյանը: Դեպքը տեղի է ունեցել 1997 թ, երբ սպանվել են ազգությամբ եզդի ամուսիններ: «Երկրորդ անձին սպանելը նույնպես ապացույց չունի, քանի որ գործով մյուս մեղադրյալը խոստովանել է, որ ինքն է սպանել: Անմեղ մարդը դրսում սպասել է: Ռեցիդիվիստը նրան ասել է դրսում կանգնի ես կմտնեմ ներս կգողանամ ոսկեղենը : Դրսում կանգնելու համար նրա վրա բարդել են երկու եւ ավելի անձանց սպանություն»,- ավելացնում է պաշտպանը: Իր հանցանքի համար, ըստ պաշտպանի, Արթուր Կիրակոսյանը ընդամենը 2 կամ 3 տարվա ազատազրկում պետք է ստանար: Ցմահ ազատազրկման դատապարտվելուց հետո, Արթուր Կիրակոսյանի տան անդամները մահացել են: Պաշտպանի բերված վճռաբեկ բողոքները մերժվում են՝ նշելով, որ հիմք չկա վերանայելու: Հայաստանում ցմահների գործերի վրա տաբու է դրված: Նշում է իրավապաշտպան Ռոբերտ Ռեւազյանը. «Չեն ուզում ուղղակի պատասխանատվություն վերցնել իրենց վրա, վերաբացելը նշանակում է նոր գործի քննություն, հնարավոր նոր անձանց հայտնաբերում, սխալ դատավճռի հետեւանքով նաեւ նոր մոտեցում պետք է լինի»: Նա հիշում է՝ բազմաթիվ են եղել փորձերը նոր երեւան եկած ապացույցների հիմքով գործերը վերաբացելու համար, բայց որեւէ մեկով վարույթ չի նախաձեռնվել.«Պետք է կամք եւ սկզբունքայնություն այդ հարցերը վերանայելու համար»: Ցմահ ազատազրկվածների դեպքում չի գործում նաեւ պայմանական վաղաժամկետ ազատ արձակման ինստիտուտը: 97 ցմահ ազատազրկման դատապարտված անձանցից 30-ն արդեն հատել են 20 տարվա շեմը եւ ըստ օրենքի կարող են ազատ արձակվել: Բայց նախադեպ դեռ չկա։