«Հեռուստաընկերությունների մեծ մասը դարձավ իշխանությունների խոսափողը» (տեսանյութ)
Մամուլի ազատության տեսանկյունից հետընթաց կա. մամուլի ազատության միջազգային օրն արձանագրում են հայաստանյան կազմակերպությունները: Քաղաքացիական անհնազանդության շարժման ընթացքում թիրախում հայտնվեցին լրագրողները: «Բոլոր խախտումները, ֆիզիկական ճնշումները եղան մինչեւ Սերժ Սարգսյանի հրաժարականը », - ասում է Խոսքի ազատության պաշտպանության կոմիտեի նախագահ Աշոտ Մելիքյանը: Բողոքի ակցիաների ընթացքում լրագրողների նկատմամբ ֆիզիկական բռնության 16 դեպք արձանագրվեց։ Միայն 2 դեպքում խոչընդոտումն առանց ֆիզիկական բռնության էր: 9 դեպքում էլ լրագրողները տուժեցին հրմշտոցների եւ հատուկ միջոցների կիրառման արդյունքում: «Մեղավորները պետք է պատժվեն: 1-2 դեպք կարող ենք հիշել, որ լրագրողին ծեծողը պատասխանատվության է ենթարկվել »,- ասում է Ինֆորմացիայի ազատության կենտրոնի ղեկավար Շուշան Դոյդոյանը: Հեռուստաընկերությունների աշխատանքն այս օրերին չի գոհացրել մեդիա փորձագետներին: «Նրանց ճնշող մեծամասնությունը դարձավ ուժային կառույցների տրիբունան: Հենց զգում էին, որ կշեռքի նժարը թեքվում է, նրանք փոխում էին ակցենտը »,- նշում է Աշոտ Մելիքյանը: Շուշան Դոյդոյանի կարծիքով, հեռուստաընկերություններն իրեն դրսեւորեցին բավականին գորշ: «Հատկապես խոսքս ուղղում եմ հանրային հեռուստաընկերությանը»: Փորձագետները համոզված են՝ հեռարձակման ոլորտում արմատական փոփոխություններ են պետք: «Այսպիսի հեռուստաեթեր այլեւս հնարավոր չէ հանդուրժել: Հնարավոր չէ ունենալ այսպիսի հանրային հեռուստատեսություն: Էլ չեմ ասում որոշ մասնավոր հեռուստաընկերությունների մասին, որոնք փորձեցին Հռոմի պապից ավելի կաթոլիկ երեւալ »,-նշում է ԽԱՊԿ նախագահը: Աշոտ Մելիքյանի խոսքով, այս օրերի իրադարձություններն ակտիվ լուսաբանում էր հատկապես օնլայն մեդիան: «Մի իրականություն էին ցույց տալիս հեռարձակողները, մեկ այլ իրականություն էր օնլայն տիրույթում: Ինչ խոսք, օնլայնն իր օպերատիվությամբ եւ ուղիղ հեռարձակմամբ ավելի շատ լսարան էր գրավում»: Մամուլին զուգընթաց այս օրերին զարգացավ քաղաքացիական ժուռնալիստիկան: «Մարդիկ ուղիղ եթեր են մտնում, ինֆորմացիա են հաղորդում: Այն քաղաքացիները, ովքեր լայֆ են մտնում, երբ ունենան համապատասխան լրագրողական կրթություն, այլեւս նրան հասնել չի լինի »,-վստահեցնում է Շուշան Դոյդոյանը: Լրագրողներ առանց սահմանների միջազգային կազմակերպության հրապարակած վերջին տվյալներով Հայաստանը 1 բալով հետընթաց է գրանցել: Մամուլի ազատության համաշխարհային ինդեքսը նախորդ տարվա 79 միավորի փոխարեն այս տարի 80 է: