Քննարկում. «աղքատություն, արտագաղթ եւ արտաքին պարտք» (տեսանյութ)
Սերժ Սարգսյանը Հայաստանին ոչինչ չտվեց, Հայաստանը միջազգային շրջանառությունից դուրս մնացած երկիր է, այսօր լրագրողների հետ հանդիպմանն ասաց Հայաստանի Կենտրոնական բանկի նախկին նախագահ Բագրատ Ասատրյանը: «Այս քաղաքական տեղաշարժերի պարագայում այս խումբը՝ ես իրենց իշխանություն չեմ անվանում, դա շատ կլինի, կփորձեն վերագնահատել եւ մտածել, ինչ անել երկիրը դեպի լավ ապագա տանելու համար: Այս ճանապարհը, որով գնացել են, տանում է քայքայման»: Բագրատ Ասատրյանը դրական երկու գործոն է առանձնացնում՝ արտահանման ծավալների աճը, տնտեսության դիվերսիֆիկացիան: Վերջին դրական տեղաշաժը Հայաստան-ԵՄ համաձայնության վավերացումն էր: «Իրականությունը դժգույն է, իսկ իշխանությունն իրեն սպառել է, պետք է հետ կանգնել, սա ճանապարհ չէ Հայաստանի համար»: Գլոբալ ճգնաժամն անցավ, բայց ներքին ճգնաժամը շարունակվում է: Կա վախ մարդկանց մոտ մինչեւ վերջ ճշմարտությունն ասելու, որովհետու առաջ են գալու պատասխանատուներ, ովքեր ձախողել են որոշ ոլորտներ, ասում է «Այլընտրանք» վերլուծական կենտրոնի ղեկավար, տնտեսագիտության դոկտոր Թաթուլ Մանասերյանը: «2016-ին գործազրկության ցուցանիշը, ըստ պաշտոնական տվյալների՝ 18.1 տոկոս է, իսկ 2017-ին՝ 0.3 տոկոսով նվազել է: 2017-ին բնակչության թվաքանակը նվազել է 1300-ով, դրան հավելեք նաեւ, որ 37 հազար մարդ արտագաղթել է եւ կտեսնեք, որ ոչ թե աշխատատեղեր են ստեղծվել, այլ կրճատվել են»:
