«Դե յուրե բացվեց նոր էջ, դե ֆակտո ոչ մի նոր էջ էլ չի բացվել» (տեսանյութ)
«Դե յուրե բացվեց նոր էջ, դե ֆակտո ոչ մի նոր էջ էլ չի բացվել», - այսօր լրագրողների հետ հանդիպմանն ասաց քաղտեխնոլոգ Կարեն Քոչարյանն` անդրադառնալով Հայաստանի խորհրդարանական կառավարման համակարգին: «Երեկ արդեն Կարեն Կարապետյանն ասաց, որ երկրի առաջին դեմք պետք է լինի Սերժ Սարգսյանը: Ոնց եղել է, էնպես էլ մնալու է, փաստացի ոչինչ չի փոխվում, իսկ երկրորդ դեմք կմնա Կարեն Կարապետյանը, ինչպես հիմա է»: Ինչ վերաբերում է նախագահ Արմեն Սարգսյանին, Կարեն Քոչարյանը նշում է. «Ես որևիցե կոպիտ բան չեմ ուզում ասել: Դէ ֆակտո չորրորդ նախագահը կամ սրանից հետո գործող նախագահները փաստացի որևէ ֆունկցիա չեն ունենալու: Հիմա եթե դուրս գանք փողոց ու հարցնենք, թե ով է Գերմանիայի կանցլերը, կասեն՝ Մերկելը, բայց թե ով է նախագահը դժվար թե իմանան: Նույնն էլ Հայաստանի պարագայում է՝ Հայաստանի նախագահին շատերը չեն ճանաչելու և նա որևէ ֆունկցիա չի ունենալու»: Ըստ քաղտեխնոլոգի, նախագահի պաշտոնը սիմվոլիկ է, որևիցէ հարց Արմեն Սարգսյանը չի լուծելու, միգուցե արտաքին քաղաքականության մեջ իր կապերն օգտագործի, որոնք ապագա վարչապետներին պետք գան: «Քաղաքական դաշտում շատ լուրջ ռեգրես է եղել: Հայաստանում քաղաքական դաշտ չկա, այն փոշիացած է՝ գրեթե իսպառ: Չկան այն կուսակացությունները, որոնք պայքարում են գաղափարի համար: Անգամ ՀՅԴ-ն, որը մշտապես համարվել է գաղափարական, այսօր չունի երբեմնի խարիզման, մնացածի մասին ընդհանրապես չեմ խոսում, անիմաստ է»,-եզրափակեց Կարեն Քոչարյանը: Նիկոլ Փաշինյանի Իմ Քայլը արշավին անդրադառնալով, Կարեն Քոչարյանը նշեց, որ այնտեղ լուրջ տեխնոլոգներ են աշխատում իրականում, քայլարշավի տեխնոլոգիան ժամանակին օգտագործվել է Մարտին Լյութեր Քինգի կողմից, այս տեխնոլոգիան Սերբիայում էլ է օգտագործվել: «Տարիներ առաջ Լևոն Տեր-Պետրոսյանն աշխատեց ուսանողության վրա, հիմա էլ բան չի փոխվում, բոլորն աշխատում են ուսանողության վրա, որովհետև դա ամենառոմանտիկ, ամենաէնտուզիաստ խումբն է: Դա էլ ճիշտ տեխնոլոգիա է, կստացվի, թե ոչ՝ չեմ կարող ասել, բայց որ աշխատում են բավական գրագետ, դա փաստ է»: