Դատավոր Իշխան Բարսեղյանի գործով դատաքննությունն ավարտվեց (տեսանյութ)
Դատավոր Իշխան Բարսեղյանին մի անգամ պարտադրաբար են ներկայացրել իր գործով դատական նիստին: Այսօր դատարանում հիշեց այդ օրը. «Ոչ պատշաճ վիճակում, հողաթափերով, ոտաբոբիկ եւ այլն»: Կաշառք վերցնելու մեջ մեղադրվող Իշխան Բարսեղյանն այսօր, սակայն, դատավոր Վաչե Մարգարյանին այլ հիմքով ինքնաբացարկի միջնորդություն ուներ: Նրա խոսքերով՝ հունվարի 31-ին իրեն շտապ տեղափոխել են հիվանդանոց, ուստի փետրվարի 1-ին չի կարողացել ներկայանալ դատարան: Սակայն դատավորը հայտնել է, որ դեռեւս ձեռնպահ են մնում բռնի ուժով դատարան բերելու գործընթացից. «Դուք ակնհայտ, բացահայտ վախեցնում եք, սպառնալիքներ եք հնչեցնում իմ հասցեին, ինչով ոտնահարում եք իմ իրավունքները»,- ասաց Իշխան Բարսեղյանը՝ նշելով, որ դատարանն ակնհայտ նախատրամադրվածություն ունի իր հանդեպ եւ ինքնաբացարկի միջնորդություն ներկայացրեց: Դատախազն առարկեց միջնորդության դեմ, դատավորն էլ խորհրդակցական սենյակից վերադառնալով մերժեց: «Իշխան Բարսեղյանի նկատմամբ դատարանը նախատրամադրվածություն եւ ընդհանրապես կողմերի նկատմամբ նախատրամադրվածություն եւ կանխակալ վերաբերմունք չունի, հետեւաբար միջնորդության մեջ նշված հանգամանքները առարկայազուրկ են եւ պայմանավորված են Իշխան Բարսեղյանի սուբյեկտիվ մոտեցմամբ»,- պարզաբանեց դատավորը: Պաշտպանական կողմը դատաքննությունը լրացնելու մասին այլ միջնորդություններ չներկայացրեց: Վարդուհի Էլբակյանը պարզաբանեց, թե ինչու: Դատարանը մինչ այդ իրենց ներկայացրած բոլոր միջնորդությունները մերժել է.«Որեւէ միջնորդություն, որը կարող է այս գործի համար էական նշանակություն ունենալ, ձեր կողմից չի բավարարվել: Մեզ մոտ կարծիք է ձեւավորվել, թե ինչ կարգի միջնորդություն էլ ներկայացնենք, մերժելու եք»: Այսպիսով, մեկ տարի չորս ամիս տեւող դատաքննությունն այսօր ավարտվեց: Հաջորդ դատական նիստին՝ ապրիլի 12-ին դատախազը հանդես կգա ճառով: Իշխան Բարսեղյանին, ըստ մեղադրանքի, սպառնում է 7-ից 12 տարվա ազատազրկում: Նա չի ընդունել իրեն առաջադրված մեղադրանքը: Իսկ ահա կաշառքի միջնորդություն կատարելու մեջ մեղադրվող փաստաբան Էլզա Զաքարյանը ընդունել է մեղադրանքը:
