ՊՊԾ գնդում մահացած ոստիկանների մարմինների վրա առկա են եղել նաեւ բութ առարկայով վնասվածքներ
ՊՊԾ գնդի գրավման օրերին մահացած ոստիկաններ Յուրի Տեփանոսյանի եւ ոստիկանության գնդապետ, ՊՊԾ գնդի հրամանատարի տեղակալ Արթուր Վանոյանի մարմնի վրա, բացի հրազենային վնասվածքներից, առկա են եղել նաեւ բութ առարկայով հասցված վնասվածքներ: Այս մասին պարզ դարձավ այսօր՝ «Սասնա ծռեր» խմբի 10 անդամի գործով հրապարակված ՊՊԾ գնդի գրավման օրերին սպանված ոստիկանների՝ Արթուր Վանոյանի, Յուրի Տեփանոսյանի եւ Գագիկ Մկրտչյանի դիակի դատաբժշկական փորձաքննության եզրակացության արդյունքներից: Ըստ դիակի դատաբժշկական փորձաքննության եզրակացության՝ Գագիկ Մկրտչյանի վնասվածքները հասցվել են բութ առարկայով, իսկ հրազենային վնասվածքի ստացումն անմիջականորեն կապվում է նրա մահվան փաստի հետ: Գագիկ Մկրտչյանը մահացել է օգոստոսի 13-ին: Նրա սպանության մեջ մեղադրվում է «Սասնա ծռեր» խմբի անդամ Արմեն Բիլյանը: Յուրի Տեփանոսյանի մարմնի վրա էլ բացի հրազենային վիրավորումից հայտնաբերվել է նաեւ սալջարդ, որը պատճառվել էր կենդանության օրոք՝ սուր եզր ունեցող կույր առարկայով: Յուրի Տեփանոսյանի եւ Արթուր Վանոյանի սպանությունների մեջ մեղադրվում է «Սասնա ծռեր» խմբի անդամ Սմբատ Բարսեղյանը:
