«Ազգի դրոշը վերածել եք բաղնիքի խալաթի» (տեսանյութ)
Արամ Մանուկյանի արձանի համար ընտրված վայրը բացարձակ հարմար չէ, այն ոտքի տակ է, ասում է ճարտարապետ Ֆերդինանտ Առաքելյանը: «Դրոշը ոտքերի տակ այդպես փաթաթելու իրավունք չունենք, դրոշը վերածվել է բաղնիքի խալաթի: Եթե պարոն կուսակցականները շատ են ուզում, որ դրոշը լինի, թող թիկնոցի տեսքով գոնե օգտագործեն: Դրոշը Արամ Մանուկյանինը չէ, այլ մերն է՝ժողովրդինը»: Ըստ հասարակական գործիչ Կարինե Հակոբյանի արձանը հեգնանքի, զավեշտի տարրեր ունի իր մեջ եւ այստեղ գործ ունենք հովանավորչության հետ. «Մրցույթը տեղի է ունեցել օրենքի կոպիտ խախտումներով: Քանդակագործ Դավիթ Մինասյանը որեւէ կենսագրություն չունի, որով կարող է հպարտանալ: Հանձնաժողովի կազմում մեծամասամբ կուսակցականներ են, մասնավորապես Աղվան Վարդանյանը, որեւէ մեկը կարող է բացատրել՝ ինչու՞»: Բանախոսներն անդրադարձել են նաեւ Զվարթնոցի եւ Գյումրու օդանավակայանների հարցին: Որոշ մարդիկ անպատիժ եւ անարգելք ձեւով անում են այն, ինչ ուզում են, նույնիսկ հաշվի չեն առնում կառույցի հեղինակի կարծիքը, ասում է ճարտարապետ Գուրգեն Մուշեղյանը: Նա ցուցադրում է Ֆրանսիայում հրատարակված մի ամսագիր, որտեղ տպագրված է ամենահայտնի 11 օդանավակայան՝ Փարիզի, Տեխասի, Աբու Դաբիի, Բեռլինի օդանավակայանների կողքին ցանկում տեղ է գտել նաեւ Գյումրու «Շիրակ» օդնակավակայանը: «Այս ամենից հետո ոմն տնօրեն իրավունք է վերապահում այնտեղ կատարելու փոփոխություններ եւ շինարարական միջամտություններ»: Կարինե Հակոբյանի կարծիքով, ոչ թե պետք է բողոքել օդանավակայանի սեփականատիրոջից, այլ այդ քաղաքականությունը մշակողից, այն մարդուց, որը վաճառքի պայմանագիր է կնքել: Ոլորտը ղեկավարողի հրաժարականը պետք է պահանջել: Հիշեցնենք, որ Քաղաքացիական ավիացիայի գլխավոր վարչությունը քննարկման է ներկայացրել «Զվարթնոց» միջազգային և Գյումրու «Շիրակ» օդանավակայանների կոնցեսիոների կողմից ներկայացված 2018-2022 թվականների Մաստեր Պլանի նախագիծը: Ըստ այս նախագծի՝ նախատեսվում են օդանավակայանում իրականացնել մի շարք բարելավման փոփոխություններ:
