Զարուհի Փոստանջյանը կդիմի ՄԻԵԴ (տեսանյութ)
«Երկիր Ծիրանի» կուսակցությունը մերժում է բոլոր նրանց, ովքեր մասնակից են եղել Հայաստանի Հանրապետության թալանին: Խոսքը տվյալ դեպքում վերաբերում է ՀՀ նախագահի ՀՀԿ-ի թեկնածու Արմեն Սարգսյանին: «Այս անձը խառնված է Ամուլսարի գործարքին, կապ ունի Ամուլսարի գործարքի հետ, բացի այդ, մեզ համար անհասկանալի է, թե այս մարդը ինչպես է դարձել միլիոնատեր: Եղել է ՀՀ դեսպանը եւ լինելով պետական պաշտոնյա, այդ պաշտոնում նա իրավունք չուներ զբաղվելու պետական ձեռնարկատիրությամբ: Այստեղ կան շատ հարցեր եւ պարզաբանումների կարիք կա, թե լինելով տարբեր կազմակերպությունների մեջ որպես ղեկավար մարմնի անդամ ինչպես է համատեղել դեսպանի գործունեությունն այդ ղեկավարման հետ»: Գործող սահմանադրությամբ իրականացվող փոփոխությունը «Երկիր Ծիրանի»-ին համարում է անօրինական։ Զարուհի Փոստանջյանը հիշեցնում է, որ սահմանադրական փոփոխություններն ընդունվել են կեղծված հանրաքվեի արդյունքում։ « Բոլորիս է հայտնի, որ մենք չունենք սահմանադրություն եւ այդ սահմանադրության ներքո այսպիսի նշանակումները նույնպես ապօրինի են»: « Երկիր Ծիրանի» կուսակցությունը պատկերացնում է ՀՀ-ում փոփոխությունները միմիայն համահայկական ընդվզման միջոցով: Բայց կուսակցությունն արդեն խոչընդոտների է հանդիպում, նույնսիկ ՀՀ սահմանը հատելուց հետո։ Հունվարի 21-ին արգելվել է Զարուհի Փոստանջյանի մուտքը Վրաստան։ Զարուհի Փոստանջյանի համոզմամբ՝ Վրաստան իր մուտքի արգելքի պատճառը ՀՀ իշխանություններն են: ՀՀԿ խմբակցվության ղեկավար Վահրամ Բաղդասարյանին չէր զարմացրել մեղադրանքը, բայց համարել էր անհիմն։ Նա նաեւ խոստացել էր զբաղվել այս հարցով. «Վահրամ Բաղդասարյանը դեռ իշխանություն չէ: Ես նրան իշխանություն չեմ համարում, չեմ ճանաչում, որ նրան դիմեմ, երկրորդը՝ պարզաբանում պահանջել եմ ըստ ընթացակարգի»,- ասում է «Երկիր Ծիրանի» կուսակցության նախագահը: Մասնագիտությամբ փաստաբան Զարուհի Փոստանջյանը մտադիր է այս հարցով հասնել մինչեւ Եվրադատարան։