Մայրը համոզված է՝ որդուն սպանել են զորամասում, ապա՝ կախել. ակցիա (տեսանյութ)
Արդեն 10 տարի է` Գոհար Սարգսյանը չգիտի իր որդու մահվան իրական պատճառը: Վարդենիսի Կարճաղբյուր գյուղի զորամասում մահացած Տիգրան Օհանջանյանը ըստ գործի նյութերի, 2007թ. օգոստոսի 30-ին էլեկտրահարվել էր: «Երբ Աղվան Հովսեփյանը դատախազ էր, բազմիցս եղել եմ իր մոտ, ես ասում եմ՝ դուք ապացուցեք, որ իմ երեխան էլեկտրահարվել է, ես էլ բողոք չունեմ: Այդ ցավը ավելի տանելի է, քան իմանաս, որ քո տղային սպանել են՝ ի՞նչի համար, չգիտես»,- «Ա1+»-ին ասաց Գոհար Սարգսյանը: Նախկին դատախազ Գեւորգ Կոստանյանի հետ էլ Գոհար Սարգսյանը գնացել է զորամաս: Նրան եւս ասել է, որ եթե ապացուցեն, որ որդին էլեկտրահարվել է այդ դեպքի վայրում, ոչ մի բողոք չի ներկայացնի. «Նա ասեց՝ կասկած չկա, որ դեպքի վայրը փոխվել է»: Տիկին Գոհարը համոզված է՝ որդուն սպանել են Հայկազ Բաղմանյանի թիկնապահները, այդ իսկ պատճառով էլ այն չի բացահայտվում: 8 տարի էլ իր որդու մահվան իրական հանգամանքները պարզելու համար է պայքարում Նանա Մուրադյանը: Ըստ գործի նյութերի՝ Վալերի Մուրադյանին դրդել են ինքնասպանության: «8 տարի է՝ գոռում եմ լավ դրել եք ինքնասպանության դրդում հոդվածը , լավ ձեր մուրը ձեր գլուխը , բա դրդողներն ո՞ւր են»: Դեպքից տարիներ անց նոր միայն հայտնաբերել են դրդողները եւ նրանք նկատմամբ հետախուզում հայտարարվել: Հենց այդ պատճառով էլ հերթական անգամ գործը կասեցրել են: Որդեկորույս մայրը, սակայն համոզված է՝ Վալերիին սպանել են. «Իմ տղայի վրա մարմնական վնասվածքներ կան, բութ առարկայով քերծվածքի տեղեր կան, վնասվածներ կան: Այն աթոռը, որի վրա իրենց ասելով իմ տղան կանգնել է , հետքեր չեն վերցրել, իմ տղայի զինվորական կոշիկները գոյություն չունեն: Իմ տղային մահացած են բերել , կախել: Պարանոցի վրա պարանի տեղը երեւում է, որ սպանել են, հետո նոր բերել կախել են, որի մասին խոսում է նաեւ դատաբժիշկը»,- ավելացնում է Նանա Մուրադյանը: Այս գործով նախաքննությունը պարբերաբար վերսկսվում է եւ նորից կասեցվում: Այսօր կառավարության շենքի դիմաց էին նաեւ «Նորաշեն 2007» սպառողական կոոպերատիվից տուժած քաղաքացիները: Նրանք ութ տարի առաջ բնակարանի գնման պայմանագիր են կնքել, սակայն մինչ օրս բնակարան չունեն: Դատական ատյաններն էլ իրենց օգտին չեն որոշում կայացրել: «Դատական ատյաններ չունենք, դրանք լրիվ թատերական ներկայացումներ են: Մեր իրավունքները ոտնահարեցին, բառիս բուն իմաստով մեզ տրորեցին, վաշխառուները, քանի որ պաշտոնավոր էին, մաքուր դուրս եկան: Մեր բնակարաններից իրական տերերին հանեցին, իրենք դառել են իրական բնակարանների տերեր: Հիմա ինչ ուզում են անում են, ծախում են»,- ասում է Արուս Վանյանը: Նրանք հիշեցնում են՝ տարիներ շարունակ վարձով են ապրում եւ բարոյապես ու ֆինանսապես շարունակում են տուժել:
