Արայիկ Խանդոյանը վատացել էր, Արմեն Բիլյանը՝ հացադուլ սկսել (տեսանյութ)
«Սասնա ծռեր» խմբի անդամ Արմեն Բիլյանն արդեն 3 օր է հացադուլ է հայտարարել. «Երեկ է պաշտոնապես դիմում է գրել, հիմա գտնվում է հացադուլավորների խցում, որտեղ կյանքի համար անհամատեղելի պայմաններ են: Ահավոր ցուրտ է եւ հնարավոր չէ մնալ այդ սենյակում»,- ասաց նրա պաշտպան Արմինե Ֆանյանը: Արմեն Բիլյանը հացադուլ հայտարարելով՝ պահանջում է իրեն պատշաճ բուժօգնություն ցուցաբերել. «Ներկայումս գլխապտույտներ ունի, աչքի այրոց, գլխի մեջ այրոցներ»: Եթե Արմեն Բիլյանը պահանջում է պատշաճ բուժօգնություն ցուցաբերել, ապա նրա պաշտպան Արմինե Ֆանյանը նաեւ պահանջելու է նրան տեղափոխել «Նուբարաշեն» ՔԿՀ-ից. « Քանի որ գտնում ենք, որ այդ քրեակատարողական հիմնարկը կյանքի նվազագույն պայմաններ նույնիսկ ի զորու չէ ապահովվել: 13 հոգի է բնակվում պաշտպանյալիս խցում, բոլորն էլ ծխում են եւ նրա առողջական վիճակի պայմաններում ուղղակի անհամատեղելի են»: Չնայած հացադուլի մեջ գտնվելուն, այսօր Արմեն Բիլյանը ներկայացել էր դատարան: Էրեբունի եւ Նուբարաշեն վարչական շրջանների ընդհանուր իրավասության դատարանում այսօր մեկնարկած «Սասնա ծռեր» 1-ի գործով դատական նիստի հենց սկզբում Գագիկ Եղիազարյանը ցանկացավ հայտարարությամբ հանդես գալ: Դատավոր Մեսրոպ Մակյանը լսելով հայտարարության մի փոքր մասը ՝ հայտարարեց, որ այն ապացույցների հետ կապ չունի եւ թույլ չտվեց շարունակել: Գագիկ Եղիազարյանը հրաժարվեց մասնակցել նիստին: «Ես կողջունեմ, որ դուք մնաք եւ մասնակցեք ապացույցների հետազոտմանը, որպեսզի կարողանաք այսօրվա նիստի ավարտին հանդես գալ հայտարարությամբ»,- հայտարարեց Մեսրոպ Մակյանը: Սմբատ Բարսեղյանի պաշտպան Հայկ Ալումյանը հայտարարեց՝ իր պաշտպանյալին թույլ չեն տվել ՔԿՀ-ից դատարան բերել տետրը, որտեղ գործին առնչվող գրառումներ են արվել: Այս առնչությամբ, Մեսրոպ Մակյանը ցանկացավ լսել Սմբատ Բարսեղյանին: Վերջինս ասաց՝ տետրը ստիպված է եղել թողել խցում, որպեսզի ձեռքից չվերցնեն: Հայկ Ալումյանը միջնորդեց մի քանի ժամով նիստը հետաձգել, մինչեւ պարզվի իրականում ինչ է տեղի ունեցել: Երբ դատախազը ցանկանում էր միջնորդության վերաբերյալ կարծիք հայտնել, Սմբատ Բարսեղյանը շարունակում էր խոսել: Դատավոր Մեսրոպ Մակյանը նախազգուշացրեց՝ ստիպված է լինելու խոսափողները հավաքել եւ ընդմիջում հայտարարեց: Ընդմիջումից հետո խոսափողները հավաքված էին: Սա առաջացրեց Սմբատ Բարսեղյանի պաշտպան Հայկ Ալումյանի զարմանքը: «Հիմա հաջորդ անգամ, ենթադրենք, «Սասնա ծռեր»-ից որեւէ մեկի վարքագիծը ձեզ դուր չգա, այդ անգամ կարող է սեղաններն էլ հավաքե՞ք: Դուք դա արեցիք մեզ ինչ- որ չափով անհարմարություն պատճառելու համար»,- ավելացրեց Հայկ Ալումյանը: Փոխարենը դատավոր Մեսրոպ Մակյանը վստահեցրեց՝ ավելի հարմար է լինելու. «Եթե անհարմարություն լինի, խոստանում եմ նախկին վիճակին բերել»: Դատավորը նաեւ տեղեկացրեց, որ այսօր Շտապ օգնություն է հրավիրվել դատարան՝ Արայիկ Խանդոյանի համար: Այնուհետեւ դատարանը սկսեց հետազոտել գործում առկա գրավոր ապացույցները: