«Լեռնային պար»-ը չունի իր հիմնական տեղը (տեսանյութ)
Վերականգնումից երկու տարի անց «Լեռնային պար» քանդակը դեռեւս չի գտնում իր հիմնական տեղը:
«Գլխավոր պողոտայի վրա առաջարկեցինք, այնտեղ խաչքարեր են դրված եւ շատ է լցված: Մի անգամ էլ իրենք առաջարկեցին Ավանի այգում, որտեղ արդեն մի սպիտակ արձան էր տեղադրված»,- «Ա1+»-ին ասաց քանդակագործ Տիգրան Արզումանյանը:
Մի քանի տարի առաջ հայտնի դարձավ, որ քանդակը, որը մոտ 30 տարի զարդարում էր Դվին հյուրանոցի տարածքը, ոչնչացման եզրին է։ Քանդակի գրեթե 60 տոկոսը վնասված էր: Ահազանգից հետո քանդակը տեղափոխվեց։ Ժամանակին 11 տարի քանդակի վրա աշխատած Տիգրան Արզումանյանը 6 ամիս էլ տրամադրել է վերականգնմանը: «Դվին» հյուրանոցի սեփականատիրոջ եւ Մշակույթի նախարարության տրամադրած գումարներով վերականգնված արձանախումբը գտնվում է Երեւանի գեղարվեստի կոմբինատում:
«Այս քանդակը չեմ ուզում, որ մյուս տխրահռչակ քանդակների բախտին արժանանա, որոնց հեղինակներն արդեն չկան: Աճառյանի փոքր գլուխը, որը «Նաիրի» կինոթատրոնի դիմացի մայթին կա, մինչեւ օրս գողացվել է եւ չեն գտնում: Ուզում եմ Կենտրոնում լինի, արվարձաններում դժվար վերահսկողություն լինի»,- ավելացնում է Տիգրան Արզումանյանը:
Քանդակագործը կարծում է, որ արձանախումբը պետք է տեղադրվի փոքր կենտրոնում. «Փոքր կենտրոնում են պտտվում հյուրերը: Տուրիզմի քաղաք ենք առաջարկում, որ լինի: Սա ազգային խմբաքանդակներից հազվագյուտ խմբաքանակն է, որը դրվել էր Դվին հյուրանոցում: Հիմա պարզապես այնպես է կառուցապատված, որ այնտեղ տեղ չկա այս քանդակի համար»:
Տիգրան Արզումանյանը հույս ունի, որ գոնե 2018 թ քանդակի հիմնական տեղը կորոշվի։ Նրան հույս է տալիս հանգամանքը, որ օրեր առաջ քոչարին Հայաստանի հայտով գրանցվել է ՅՈՒՆԵՍԿՕ-ի մարդկության ոչ նյութական մշակութային ժառանգության արժեքների ներկայացուցչական ցանկում:
