Հայ-իրանական նոր ֆիլմ՝ «Եվա»
Սեպտեմբերի 23-ին մայրաքաղաքի «Մոսկվա» կինոթատրոնում տեղի ունեցավ իրանահայ ռեժիսոր Անահիտ Աբադի «Եվա» (աշխատանքային վերնագիրը՝ «Քարվաճառ») հայ-իրանական համատեղ արտադրության նոր ֆիլմը։ Իրանահայ ռեժիսորը մինչ այս էլ ֆիլմեր է նկարել Հայաստանում, սակայն «Եվա»-ն նրա առաջին լիամետրաժ կինոնկարն է։
Հայաստանի ազգային կինոկենտրոնի և «Ֆարաբի» ֆիլմարտադրության կենտրոն» հիմնադրամի (պետական ֆոնդ) ֆինանսական աջակցությամբ նկարահանված «Եվան» դրամա է։ Ֆիլմը մի կնոջ մասին, որն ուզում է մոռանալ իր կյանքում տարիներ առաջ տեղի ունեցած մութ ու ծանր պատմությունը։ Նա դստեր հետ հեռանում է Երևանից, հաստատվում է Արցախում՝ ծանոթների մոտ։ Սակայն, անցյալը ամենուր հետապնդում է նրան․․․
Ռեժիսորի հաղորդմամաբ, 2017թ․ մայիսին՝ Կաննում իրենք կազմակերպել են կինոնկարի փակ ցուցադրությունը, ինչը դրական արձագանքների է արժանացել միջազգային կինոգետների կողմից։ Առաջարկ է եղել կինոնկարի առաջին ցուցադրությունը կազմակերպել արտերկրում․․․Սակայն, հենց Անահիտ Աբադի ցանկությամբ, էլ մինչև ֆիլմի համաշխարհային պրեմիերան, այն, նախ, կներկայացվի հայ և իրանցի հանդիսատեսին, որից հետո նոր կսկսվի ֆիլմի միջազգային ցուցադրությունների շարքը։ Իսկ պրոդյուսերները ցուցադրման գործընթացին զուգահեռ կաշխատեն ֆիլմը ներկայացնել միջազգային հայտնի փառատոներում։
Ֆիլմն արտադրվել է իրանական կողմի զգալի ֆինանսական ներդրմամբ և ՀՀ կառավարության աջակցությամբ:
Ֆիլմը նկարահանվել է Արցախում։ Դերասաններն են Նարինե Գրիգորյանը, Շանթ Հովհաննիսյանը, Մարջան Ավետիսյանը, Ռոզի Ավետիսովան, Սերգեյ Թովմասյանը, Վրեժ Քասունին, Տիգրան Դավթյանը, Նանոր Պետրոսյանը, Էվելինա Ադամյանը, Մարատ Դավթյանը և այլք։
Կինոնկարի գլխավոր ռեժիսորն ու սցենարի հեղինակը Անահիտ Աբադն է, օպերատորը՝ Հասան Քարիմին, կոմպոզիտորը՝ Վահան Արծրունին, իսկ պրոդյուսերը՝ Թաղի Ալի Ղոլիզադեհը։
Նշենք նաև, որ «Եվա»-ի արցախյան և իրանական պրեմիերաները կկայանան հոկտեմբեր ամսին։
Հայաստանի ազգային կինոկենտրոն
